Ka jingker sainar shiah sha khappud Bangladesh

Bah RM Shabong

Shisien pyrkhat, lah ban ong ba U bah Prestone Tynsong, ula kren khor, haba u ong ba ki don kiba kwah ban ker sainar shiah naduh na Sylhet, hynrei lada peit ia ki map bad ki histori jong ka jaitbynriew Khasi, ka don hangtei ka jing shisha bad kata ka long ba U Khasi hyndai, u don ka jingiadei kaba jan bha bad ka Bangladesh, u don ia shibun ki jaka rep jaka riang, kiba la pyn ia khlad noh naduh ka por jong ka jing ia phiah ka India bad ka Pakistan bad kumta ter ter bad wat ha ka siew khajna bad kiwei ha ka por ka sorkar phareng, ki Khasi, kim ju wan sha Shillong, hynrei ki poi khah khah sha Sylhet.

Ha kane ka pateng kaba mynta, lyngba ka jing ia snoh bad ka India bad sa kiwei ki daw, ki Khasi, ki la sahkut noh u pud u sam jongki tang ha Wah Umngot lane ha Pyrdiwah, lane ha Shella, Balat bad kumta ter ter bad ka la dei ruh ka por ba kin sngewthuh ba ki jingjia, ki la ialam ba ngin duh ia kiba bun bah ki jaka puta jongngi bad kiba ngin nym lah shuh ban dang iakren da kumwei pat, namar ba wat ka United Nations ruh kan nym lah ban pynbeit shuh ia katei ka jyrwit jyrwat.

Mynta kaba donkam, ka long ba ngin ri ngin sumar noh tang ia kine kiba dang don ha kti jongngi bad ba kan nym jia, kumba ka long ia u pud jong ka Meghalaya bad ka Assam bad hangne ka mih ka jingiakren, ba lada ker sainar shiah ruh, kam dei ban pynduh noh ia ka jaka ka puta kaba hap ha ki trai jong kitei ki thain khappud.

Hap ban ong ba ka sorkar India, kan salia aiu te lada jia ba duh noh ia ka hajar hectare ka jaka bad wat ka sorkar Jylla ruh, hynrei uba dei ban thab shyllang, u dei u trai jaka puta, uba theh ia la ka syep da ka um bad wat uba hab ban theh ruh da ka snam, namar ba lada u duh ia shi phut ka jaka jongu, kumta u la nang duh ia ka ka kamai kajih bad ia u khaw u kba jongu.

Ki don ki seng kiba pyrshah ban ker sainar shiah, hynrei ka sorkar India lem bad ka sorkar Jylla, ka la nang iaid sha la ka jong ka lynti ban ker sha ki jaka, kiba lait na ka jing ia pyrshah; tangba katba ka jia, ka jingleh tuh, ka jingshim kabu bad ka jing shaniah ia ki kompeni, ban ia ki trai jaka, ka dei kaba pyn ingkhong ia kiba bun ki trai shnong bad ia kata ngi iohi ha kine ki sngi, ba kumno ki sengbhalang bad ki trai jaka ki khih bitar sha War Jaintia bad katei ka pyni ba ka don ka jing lehsting jong ka sorkar Jylla bad haba ka long kumta ka pyntieng pynban ia kiba bun ki trai jaka ban ailad ia ka jingker sainar shiah sha ki jaka jongki.