Ka jingjop bun ka Congress, ka dei na U Mukul Sangma, ong U Ma Rymbui

Shillong:U myntri ka tnad pule puthi, u bah Lahkmen Rymbui, u la ong ba ka jingjop bun jong ka party Congress ha kane ka election MDC ha Garo Hill Autonomous District Council, ka dei na ka daw u nongialam jong ki, u Dr Mukul Sangma.

Haba iakren bad ki lad pathai khubor, u bah Rymbui u la ong ba kane ka jingjop bun seat jong ka Congress ka dei ka jinghikai ia ka Congress, hi ia kito kiba ong ba u Dr Mukul Sangma, um lah shuh ban ialam ia ka party.
“Na kane ki dei ban sngewthuh ba u Dr Mukul Sangma u dei u nongialam u ba dang khlain ka jingshaniah jong ki paid bah ha u,” u la ong.

Ka jingbym lah jong ka party United Democratic Party, ban jop tang na kawei ruh ka constituency, ka pawshai ba ki paidbah ka Rilum Garo ki dangvote ha u nongialam, ym ha ka party, ong shuh U bah Rymbui.
U bah Rymbui, u la ong ruh ba mynta ka kynti ha ka election GHADC kam shem don kawei ruh ka party riew lum ka ban ioh ia ka jingjop, lait noh tamg ka GNC, hynrei ki paidbah ka rilum Garo ki dang don hi ka jingshaniah ia ki national party.