Bah RM Shabong
Shillong:Ka jingleit iuhkjat jongnga sha ka nongbah Trichy jong ka Tamil Nadu lane ka Tiruchapalli, ka dei kawei na ki jingleit ban sah kynmaw bad ha shwa ban mih na Chennai, kaba dei ka nongbah jong katei ka jylla, nga la kyndit thret ban iohi, ia ka jaka ieng jong ki bos ha rud katei ka nongbah, kaba long hi thik kum ka Super Market bad ia katei ka jaka ieng bos, kaba ngiam da ki spah tylli ki bos heh, la ai kyrteng kum ka Kilambakam Bus Terminal. Hangtei ki don ki dukan ja, dukan sha, ki shuki kiba khuid bad kiba skhem bha, ba kin shong jah thait ki nongleit nongwan bad kumjuh ka jaka leit shabar kaba khuid bad suba bha.
Ha ka jingleit sha Trichy, da ka bos, ka shim por haduh 6 kynta bad haba nga iohi, ia ki bos kiba heh bad kiba jrong, nga la lam itieng, namar ba ngi ia ioh jaka ban shong ha ka kyrdan kaba halor ha kitei ki bos kiba don ar kyrdan, hynrei mar ia rung hapoh nga lap pynban, ba kiba shong hapoh sha ka liang ka mon, ki ioh ban shu shong, katba kiba shong sha ka kyrdan kaba halor bad kumjuh sha ka liang ka diang, ki ioh da ki jaka thiah ha kaba la ker da ka pyrda bad la mang lypa ia kawei ka jaka shong, na ka bynta uwei u briew. Kaba lyngngoh shibun ka long ba ka jingjlih jong ka surok, haba iaid na Chennai sha Trichy, ka pynlong ba wat tang ka slipar jong ki nongshong kali, ka don beit hajuh, haduh ban da hiar hadien 6 kynta bad kam shym la kynriah satia, wat tang shi inshi na ka jaka ba la buh.
Ha ka step kaba bud, nga la leit sha ka temple Sri Ranganathaswamy Temple, ha kaba ka jingjrong jongka, ka long haduh 239 phut tam bad katei ka temple, ka don ia ka kynroh kaba jrong bha bad nga iohi, ba ki don ki sim moina, ki sim langlit bad ki risang kiba shong ha ki kynroh jong katei ka temple, kaba ki tuid da ki phew hajar ngut ki nongleit peitkai ha ka shisngi shisngi.
Nangta nga la leit jngoh ia ka Thanjavur District bad kaba pynkyndit ianga, ka long ba ha ka jingjngai kaba tang kumba 15 Kilometre antad, ki don ar tylli ki University ha katei ka district bad nangta sa kawei ka College bad u nongniah jong ka kali kaba nga shim wai, u iathuh ba kawei na kitei ki University, ka dei ka jong ki riew shimet bad kawei ka dei ka jong ka sorkar Tamil Nadu. Ha katei ka jingleit, nga la ioh lad ruh ban leit jngoh ia ka CSI Christ Church bad nangta ia ka Swartz Church, kaba la tei ha u snem 1779 bad ha ka Swartz Church, ki don da ki spah ngut kiba leit shong jah thait ha katei ka iingmane bad kiba leit duwai, namar ba ka iingmane ka plie man ka sngi.
Ha ka por ba wan phai, nga la ioh ban leit jngoh pat sa ia ka Kallanai dam, ba la tei da U Syiem ha katei ka por bad katei ka dei ka tyllong um, kaba ia sam ia ka wah Cauvery kaba na Karnataka, na ka bynta ban ai um ia ki nongrep jong katei ka jylla. Ka rep ka dei ka bynta kaba kongsan bha ha Tamil Nadu bad haba iaid ha ar liang surok, la iohi, ba ki jingrep ba kongsan, ki kynthup ia u kba, ia u pai bad ka kait bad la iathuh ba ka Tamil Nadu, ka shalan shabar ia u khaw bad ka shini, kiba dei ki mar rep ba kongsan jong katei ka jylla, namar ba kim lah shuh ban pyndonkam ialade.
Phi don ban ong eiei?