Ka jingjia ba sngewsih kthang, bym ju jia mynno mynno ruh:Tailin

Shillong, 10 Naitung:
Ka State Commission for Women ka la khot hajir, ha ka 14 tarik mynta u bnai ia u Secretary ka Delhi Golf Club ban wan jubab ha ophis jongka ha Shillong halor ka jingshah beh ka Kong Tailin Lyngdoh na ka jaka bam ba ka shah khot tang namar ba ka riam Khasi da ka jainsem.
“Ngi la khot hajir ia u secretary ka Club ban wan jubab ha ka 14 tarik”, la ong ka chairperson ka Commission ka Kong Theilin Phanbuh hynne ka sngi.
Ka Kong Phanbuh ka la ong ba na ka liang ka Commission kan phah da ka jingthoh ba ka National Scheduled Caste and Scheduled Tribe Commission ba kan pynshitom kaba tyngeh ia ki bor pyniaid ka Delhi Club.
Ka Kong Tailin Lyngdoh ka la shah beh na jaka bam ja ha ki nongtrei ka Delhi Golf Club ha ka 25 tarik Jylliew ha Delhi.
Kat kum ka jingong ka Kong Phanbuh, ki bun ki khep ba ki briew na kane ka Dong Mihngi ki ju iakynduh ia ka jingshah ibein bad niew bein haba ki don shabar nabar Dong Mihngi.
“Ngin iakhun ban pynthikna ba kiba donkti kin ioh ia ka jingpynsaja kaba tyngeh khnang ba ka jingisih jaitbynriew kan nym jia shuh ia ki Briew na dong mihngi”, ong ka Chairperson.
Ha kawei ka liang ka Kong Tailin Lyngdoh ka la iathuh ba ka jingjia kaba la pynlong ia ka ban shah beh na katei jaka ka long kaba sngewsih kthang ha ka jingim jongka, ka bym jia mynno mynno ruh.
“Nga kwah ba dei ban pynshitom pynsaja kaba jur ia kito ki briew”, la ong ka Kong Tailin kaba don lang ha ka ophis ka Commission.
Ka la ong ba kumba 10-15 minit ba la don hangne ha katei ka jaka bam, la wan ar ngut ki briew kiba wan ban beh ia ka na jaka ba ki iashong namar ki la ai daw ba ka dei kum ka shakri bad kum ka Nepali. Ha ka jingshisha, la iakren ba ka dei kaba la shah khot, hynrei kim sngap satia.
Ha kawei ka liang, ka Nivedita Barthakur kaba dei ka trai ba sah ka Kong Tailin, ka la ong ba ka Delhi Golf Club kam pat shym la panmap, halor ka jingjia bad ka jingpanmap ka long tang kaba shu pynmih khubor. Ka la kyntait ruh ban pdiang ia ka jingtohkit kaba la thung da ka Club namar ba kam don jingmut ban thung tohkit da ka club kaba shah kynnoh ban leh ia ka kam.
“Kumno yn thung jingtohkit da ka club kaba donkti ha kane ka kam. Ym lah ban pdiang”, la long ka Barthakur.