Frankfurt: U Cristiano Ronaldo, u dei uwei na ki snar ialehkai ba triem tam, ha ka lain thep kol, hynrei hynnin ka miet, um shym la lah ban thep ia ka bol sha ka jar, ha ka por jong ka jingshut penalty, ha ka por ba ka Portugal, ka iakhun pyrshah ia ka Slovenia, ha ka EURO 2024 ha Frankfurt.
Katei ka jia, hadien ba ki arliang mamla, kim shym la lah ban thep kol, ha ka por ialehkai bad kumta, ka la poi noh, da ka jingiashut penalty bad ka dei ha katei ka por, ba u Jan Oblak, uba dei uwei na ki snar ap kol jong ka Atletico Madrid, ula ioh ban kynrup ia ka bol, kaba la pynkmen jur ia U Oblak, katba kaba la pynjaw ummat pat ia U Ronaldo bad ka dei ha katei kein ka por, ba ki paralok jongu, ki la leit ban pyntngen noh ia utei u snar ialehkai ka Portugal. Hynrei U Ronaldo, u donbok, ba ki para nongialehkai jongu, ki la lah ban pynrung jar ia ki bol kiba sah bad kiba la pynjop ia ka Portugal.
“Ka jingiam paitdohnud ha kaba sdang, ka ju wan rah ia ka jingtngen mynsiem hadien” ong U Ronaldo, haba kren sha ki kotkhubor. “Kata ka dei ka rukom jong ka jingialehkai phutbol”. “U Oblak, ula ioh ban kynrup ia ka bol bad ngam tip, la nga la shut bha ne nga la shut bakla, hynrei ngam pat ju lait satia shisien ruh ha baroh shisnem, hynrei nga lait noh, ha ka por ba nga donkam bha ia ka kol” ula ong biang.
Ka Portugal, mynta ka la rung sha ka quarter final, ha kaba kan iakhun pyrshah ia ka France, ha ka 6tarik naitung 2024.
Phi don ban ong eiei?