KA JINGIOHTHIAH BHA: Hato phi shem jingeh ban iohthiah kloi mynmiet? Katto katne ki lynti kiba phi lah ban leh ban iohthiah bha

Kong Linda Kongwang

Ka jingbymioh thiah bha mynmiet ka pynduh shibun ki jingmyntoi ha ka jingim jongphi. Ki don bun ki daw kiba lah ban pynduh thiah iaphi bad kine suki suki kilah ban ktah naduh ka bor pyrkhat, pyntlot iaka bor met, pynsniew jinglong,kyntiew iaka jingkhia ka met bad ka wanrah shibun ki jingsngew shitom haka met.

Hynrei ka jingiohthiah bha mynmiet kalah ban ai jingmyntoi shibun iaka met. Lah ban iakhun pyrshah ia baroh ki jingeh kiba phi mad naka jingbymioh thiah bha. Ka jingiohthiah bha ka lah ban ai jingmyntoi naduh ka jingkhlain ka bor pyrkhat, pynkhlain iaka bor met, pynbja jinglong, pynbiang iaka jingkhia, pynkhlain iaki bynta ba shapoh ka met, ka jinglah ban iakhun pyrshah iaki jingpang bad ka ai jingmyntoi hapdeng kito kiba la noh ka rta.

KATTO KATNE KI JINGSHITOM KIBA PHI LAH BAN MAD NE IAKYNDUH NA KA JINGBYMIOHTHIAH BHA.

1. KA PYNTLOT IAKA BOR MET: Ka jingbymioh thiah bha ka lah ban ktah nyngkong eh iaka bor met. Haba ym iohthiah bha baroh shimiet ka pyntlot iaka bor met bad kane ka jingshahktah jong ka bor met suki suki ka wanrah shibun ki jingpang ne ki jingsngew shitom haka met kum ka acidity, diabetes, jingpang klongsnam bad kyntiew iaka jingma jongka jingpang bampong haka met.
2. KA JINGSHAHKTAH KA BOR PYRKHAT:— Ka jingbymioh thiah bha ka buh jingma shikatdei eh iaka jabieng. Naka jingbymioh thiah bha ka jabieng kalah ban thut badvkane kalah ban ktah iaka bor pyrkhat kaba ialam sha ka jingklet ia kiei kiei wat naduh ki kam kiba rit philah ban klet hangto hangto hi naka daw jongka jingduh thiah.
3. KYNTIEW IAKA JINGKHIA KA MET:— Kumba la kdew haneng ka jingbymioh thiah bha ka ktah iaka bor met bad ka jingshahktah ka met ka wanrah shibun ki jingeh kynthup ka jingjaituh ban leh ia kiei kiei, ka jingshoh samthiah manla kapor bad ka jingbymlah ban treikam bha ka met bad kine ki kyntiew iaka jingkhia ka met kaba lah ban wanrah shibun ki jingshitom ha ki por ban dang wan.
4. KA JINGSNIEW JINGLONG:— Baroh ngi mad iakane ka jingeh. Ka jingbymioh thiah bha haka por miet ka pynktha khlieh iangi baroh shisngi bad kane ka ialam shaka jingsniew jinglong bad kane suki suki kalah ban ktah baroh shi jingim bad lada ka jia kumne, kan buh jingma haka jingiadei bad kiba haiing hasem ne bad kiwei ruh.
5. KA JINGTYRKHONG BAD STI KA SNIEHDOH:— Baroh kitei ki jingeh bala kdew haneng, lada ymlah ban tehlakam iaki, suki suki kin paw dak halor ka jingtyrkhong bad ring sti ka sniehdoh. Ka jingbymioh thiah bha ka lah ban ktah ruh halor ka jingsakhi dalade jongka jinghap shñiuh, ka jingtyrkhong ka durkhmat bad ka sniehdoh hi baroh kawei.

KATTO KATNE KI LYNTI KIBA PHI DEI BAN LEH BAN IOHTHIAH BHA.

[i] BAM IAKI JINGBAM BA TEI:— Ki jingbam ba tei met ki long kiba donkam bad kilong kiba kongsan naka bynta ka jingkoit jingkhiah jongka met. Ki jingbam ba tei ki kynthup ia bunjait ki jingbam kiba kynthup lang haki ka protein, fats, carbohydrates bad ka Vitamin. Ka jingkynthup lang kine baroh haki jingbam ymtang ba ki ai jingkoit jingkhiah iaka met hynrei ka pynlong ruh iaphi ban iohthiah bha. Namarkata bam iaki jingbam ba tei met ban ioh iakine ki jingmyntoi.

[ii] KA JINGKILAN MET:— Ka jingkilan met manla ka sngi ka shim iaka bynta ba kongsan naka bynta ka jingiohthiah bha mynmiet. Ka jingthait bad syep ka met na ka jingkilan met tista ka pynlong iaka met ban thait bad shoh samthiah kloi. Ka jingpynlut buh ka bor haka jingkilan met bad kiwei ki kam kadei kaba lah ban pynduna iaka jingpynlut por halor ka jingkylla thiah. Ka jingkilan met ka iarap ban iohthiah bha mynmiet bad pynkhlain iaka bor met.

[iii] PYNDUNA IAKA BAM HAKA POR BAM MIET:— Ka jingbam duna haka por miet kadei kaba biangtam kaba lah ban iarap halor ka jingiohthiah bha,kane kadei namar ka met jongngi ka kham suki ban treikam bad ka trei bor bah haka por miet naka bynta ka jinglah ban tylliat bha iaki jingbam bad lada phi bam bun shuwa ban thiah, ka jingiohthiah kalah ban thut noh bad kane ka wanrah ia ka jinglong thait ka met haka por step. Namarkata pynduna ban bam haka por miet ban lait na kane ka jingeh.

[iv] PYNDUNA KA CAFFEINE HAKA POR MIET:— Ki jingdih kiba don caffeine ki kynthup iaka sha, u kophi, ka soda bad kiwei ki jingdih pyngngad. Phi dei ban kiar na kine ki jait jingdih haka por miet namar kine kilah ban pynpeit mat bad pynsmat pynsting iaka met kaba ialam shaka jinglynga bad duhthiah haka por mynmiet.

[v] KA KYIAD:— Ka kyiad kalah ban dei ka dawai bah bad ha kajuh ka por kalah ban long ka bih ba khraw naka bynta kito kiba ju mlien ban dih. Ka jingdih khyndiat ka kyiad man ka por kalah ban iarap halor ka jingiohthiah bha mynmiet hynrei kalah ban pynduhthiah pat lada dih palat. Hynrei ka jingdih kyiad kalah ban ktah ruh halor ka rukom thiah bad pynduna iaka jinglah bor ka met ban iohthiah bha. Ka jingiohthiah bha kalong kaba donkam naka bynta ka jingtreikam halor ka bor kynmaw, namarkata lada phi dei kito kiba ju mlien ban dih, phi lah ban dih pynduna iaka kyiad kum ka dawai kaba lah ban iarap halor ka jingiohthiah bha.

[vi] KIAR NAKI JINGPYNPEITMAT:— Ka jingthaba ki smartphone, TV, computer ne laptop kidei kiba nangbah ban pynpeitmat bad duna ban shoh samthiah. Kane ka ktah shibun halor ka jinglah ban ym shohsamthiah kloi bad ka ktah ruh iaka khmat. Kiar ban khmih haki screen kiba thaba shuwa ban thiah khnang phin iohthiah bha mynmiet. khublei