Ka jingioh kam hikai, ki 33ngut kiwei ki jaitbynriew, ka dei ba ki lah ia ka interview, ong u myntri

Shillong: U Myntri ba khmih ia ka pule puthi ha ka Jylla, u Rakkam A Sangma, u la pynshai ba ka jingioh kam hikai haduh 33 ngut tang na kawei ka jaidbynriew kadei katkum ka jinglah ka jong ki ha ka por ba ki iakhun ia ka exam bad ka interview.

Hynnin ka sngi ka seng Akhil Bharatiya Vidyarthi Parishad (ABVP), Meghalaya ka la dawa ban thung da ka jingtohkit halor ka jingioh kam hikai haduh 33 ngut tang na kawei ka kynhun jaidbynriew (muslim) na ki 34 tylli ki kam ba lait ha Dadenggre Sub-Divisional School Education Officer, West Garo Hills, namar ka jingpynbna ia ka result ka la buh ruh ia u dak jingkylli bad ka Sorkar ka dei ban pynsangeh shi shyndon ia kane ka jingthung kam.

Katkum ka jingiathuh jong u Myntri ki don haduh 230 tylli ki kam hikai ba lait ha ki skul sorkar ha Dadenggre Sub-Division, bad ia ka jingthung kam la leh da kaba pyntreikam pura ia ka roster system.
U la iathuh ba ki 34 tylli ki kam ba la pynbna ia ka result kidei kiba hap hapoh ka bhah ba 15 percent jong ka Unreserved category, bad kidei na ka bynta ban hikai ha ki skul Bengali Medium bad Assamese Medium.

U Rakkam u la iathuh ruh ba napdeng ki 230 tylli ki kam hikai ba la khot interview kumba 147 tylli ki dei na ka bynta ki riewlum.