KA JINGING NE JINGKHLUIT DING

Kong L Kongwang

KA JINGING NE JINGKHLUIT DING: Ki jingsumar hi ha iing naka bynta ban pynjah iaki jingsahdak naka jingkhluit ding.

Ka jinging ne jingkhluit ding kadei ka ba ymlah ban lait ne kiar bad kumta haba don ki jinging ne jingkhluit ding ki don ruh ki jingsahdak. Baroh nangi, ngi ju ngat ha ki jingkhluit ding ne kiwei kiwei ki rukom ing shisien haka jingim jongngi bad ha kaba khatduh ka pynsah dak iaka sniehdoh jongngi. Ka jingialeh hadien kalong ban pynjah iaka jingsahdak kaba ka jinging ka ieh shadien. Kumta kaei kaba ngi dei ban leh ha kum kane ka por?

Ka jingsumar hi ha iing kadei ka lynti kaba biang tam bad bymdon jinglut kaba phim donkam ban khuslai namar ba kidei kiba shngain bad kiba long tynrai ban pyndonkam. Watla ki jingsumar ki ban sa kdew ha kane ka article kim lah ban pyni iaki jingseisoh hapoh ka shi khyllipmat bad kiba kloi hangto hangto hi, hynrei kidei kiba treikam bha bad thikna ban ioh ka jingiarap kaba bha da kaba pyndonkam borabor bad slem iaki.

Lada dei ka jingkhluit ding kaba malu mala, lah ban pyndonkam iaki tang hapoh katto katne minit hadien ka jinging ne jingkhluit ding namar kalah ban wanrah shibun ki jingkylla halor kumno ban sumar bad ban koit kloi naki jinging ne jingkhluit ding bad jingsahdak haka sniehdoh.
Hangne ki don katto katne ki jingsumar hi ha iing naka bynta ban pynjah iaki jingsahdak naka jinging ne jingkhluit ding haka sniehdoh.

KA NGAP:— Iaka ngap la ju pyndonkam kum ka jingtah naka bynta ban pynkoit kloi iaki prum (ulcer) bad ki jingmong haba ing ne khluit ding. Ka ngap ka iarap ruh ha kaba sumar iaki infection kiba pynlong naka daw ka jinging bad ruh ka iarap bha ban pynduna iaka jingsahdak naka jinging ne jingkhluit ding.
INGREDIENT: 2 shamoit ka ngap bad shi shyit u shynrai.
KUMNO BAN LEH:— Shim uwei u bul barit bad theh katto katne ka ngap ha u bul. Hadien kata ber shi shyit u shynrai haka ngap bad sa khlehlang bha ia kine baroh ar ki ingredient haduh ba kin da long sboh bad dambit. Tah iakine ki jingkhleh ha ki jaka ba mong bad sahdak bad ieh katto katne minit haduh ba kin tyrkhong. Ieh iaki la kumno kumno 10 haduh 15 minit ei ei. Hadien kata sa ñiad noh da ki tissue ne daki jain towel kiba jhieh. Leh iakine arsien haka shisngi naka bynta ki jingmih kiba phi la angnud bad kaba treikam bha.

ALOE VERA:— U Aloe Vera udon iaka jinglong anti-inflammatory bad uba lah ban pynkoit iaki jingmong bad uba iarap bha ban sumar iaki jinging ne jingkhluit ding, ki jingsahdak bad ruh kiba lah shisha ban pynjah iaka jingdait bad jingtyrha haka sniehdoh.
INGREDIENT: 2 shamoit ka Aloe Vera gel bad shi shamoit ka um tiewkulab (rose water).
KUMNO BAN LEH:— Tong is u Aloe Vera gel uba dang shudep tih na u dieng Aloe Vera bad theh haka bul. Theh katto katne ka um tiewkulab ha kine ki gel bad sa khlehlang iakine baroh ar ki jingkhleh. Shim khambun iakine ki jingkhleh bad kyllan suki suki haki jaka ba shahktah kumba 5 haduh 10 minit ei ei. Hadien kata ieh sa kumba 10 haduh 15 minit bad sa sait khuid iaki daka um. Leh iakine arsien haka shisngi naka bynta ki jingmih kiba phi la angnud.

U SHYNRAI BAD KA DUD:— U shynrai u don iaka jinglong anti-inflammatory bad kumjuh ruh iaka jinglong antiseptic kiba lah ban iarap sumar iaki jingsahdak naki jinging ne jingkhluit ding. Ka dud ka iadei bha ha kaba iarap ban pynjah iaki jingpang kiba longdait bad tyrha haka sniehdoh bad iarap ruh hakaba pynjah ia kino kino ki jingsahdak kiba ieh shadien naki jinging ne jingkhluit ding da kaba pyndonkam iaki borabor.

INGREDIENT:— 2 shamoit ka dud I’m bad shi shyit u shynrai.
KUMNO BAN LEH:– Haka bul, khleh bah katto katne ka dud im bad shi shyit u shynrai bad sa khlehlang bha iakine baroh ar ki jingkhleh. Shim u kynphad wieh ha kine ki jingkhleh bad sa tah ha ki jaka ba shahktah. Kyllan suki suki naka bynta katto katne minit hadien kata ieh sa kumba 5 minit ei ei. Hadien ka por bala buh sait khuid iaki daka um ne ñiad da ki jain towel kiba jhieh. Leh iakine arsien haka shisngi naka bynta ki jingmih kiba phi la angnud.

SOHSAW, KABA LIEH JONGKA PYLLENG BAD KA DOI:— U sohsaw udei uba dap kyrhai da ka jingdon ki tynrai ba lah ban pyntngen bad ban pynjah iaki jingpang, u sohsaw namarkata u iarap ban pynshai iaka sniehdoh, kumta pynjah ne pynstang iaki jingsahdak naka jinging ne jingkhluit ding. Ki iarap ruh ban pynum bad pynsngem kaka sniehdoh jongphi. Ka jingkhlehlang haki iaka doi bad kaba lieh jongka pylleng ruh ki iarap bha ban pynjah iaki jingsahdak naka jinging ne jingkhluit ding.
INGREDIENT:— 1 shamoit ka sboh sohsaw, 1shamoit ka doi bad 1 shamoit kaba lieh jongka pylleng.
KUMNO BAN LEH:— Shim uwei u sohsaw, tylliat haduh ba un da long sboh bha bad sa theh haka bul. Mynta, khlehlang katto katne kaba lieh jongka pylleng ha u sohsaw bad hadien kata sa ai katto katne ka doi. Khlehlang bha ia baroh kine ki jingkhleh haduh ba kin da long sboh bha. Tah iakine ki jingkhleh sboh haki jaka ba shahktah bad kyllan suki suki da kaba pyndonkam daki shympriah kti bad ieh kumba 15 minit ei ei. Hadien kata sait khuid iaki daka umpjah. Leh iakine arsien haka shisngi naka bynta ki jingmih kiba phi la angnud.

U PHAN:— U phan la jutip ba u ring ne tan shabar iaki jingkhluit naka met bad dei nakane ka daw la jied ba kidei kiba biang bha ha kaba iadei bad ki jinging ne khluit ding. Nalor kata ki iarap ruh ban pynjah iaki jingsahdak na ki jinging da kaba pyndonkam borabor bad pyndonkam slem iaki.
INGREDIENT:— U wei u phan bala phon.
KUMNO BAN LEH:— Shim ia u wei u phan bala phon, khohsnep bad sa ot arliang ia u. Shim shi lyngknot u phan bala dep ot bad sdang kyrshut ha ki jaka ba sahdak naki jinging ne khluit ding. Kyllan suki suki kumba 5 haduh 10 minit ei ei bad hadien kata sa sait khuid daka umpjah. Ha kawei pat ka liang, phi lah ban kyrshut daki snep phan ha ki jaka ba shahktah ban pynstang iaki jingsahdak na kaba ing da kaba pyndonkam slem iaki. Leh iakane arsien haka shisngi naka bynta ki jingmih kiba phi la angnud.

U PIAT BAD LAVENDER ESSENTIAL OIL:— U piat udon iaka sulphur bad quercetin kiba lah ban iarap pynjah iaki jingsahdak kiba la sahdak slem naka jinging katba ka Lavender Essential Oil ka don iaka jinglong antiseptic kiba iarap ban pynjah iaki jingpang, jingtyrha bad dait haka sniehdoh.
INGREDIENT:— Uwei u piat bala khoh snep bad shi shamoit ka lavender essential oil.
KUMNO BAN LEH:— Shim uwei u piat bala khohsnep bad sa tylliat haduh ba un da sboh bad mih um. Theh is kane ka umpiat haka bul. Pynjaw katto katne ka lavender essential oil ha ka umpiat bad sa khlehlang bha iakine baroh ar ki jingkhleh. Mynta shum ia u kynphad, wieh ha kine ki jingkhleh bad sa kyrshut ha ki jaka ba shahktah kumba 5 haduh 10 minit eiei. Nangta ieh sa kumba 5 minit ei ei bad sa sait noh pat da ka umpjah. Leh iakine arsien haka shisngi naka bynta ki jingmih kiba phi la angnud.
Khublei.