Ka jingieid jongka, ia u samla khristan, ka pynlong ba kan shah khi lyndum

Ka jingieid jongka, ia u samla, uba dei na ka niam Khristan, ka la pynlong ia ka thei samla Muslim, ba kan shah khi lyndum ha la ka jong ka iing ka sem jongka. Katei ka jingjia, ka dei ha France.

Katei ka dei ka thei samla kaba na Bosnia, kaba shong ba sah ha France bad ka dei kaba 17 snem ka rta. Ka don ia u shniuh uba jrong lymphuin, hynrei, namar ba ka ia ieid bad u samla Khristan, uba dei na Serbia, uba 20 snem ka rta, ka la shah khi lyndum, ha la kiba ha iing. Katei ka jingjia, ka dei ha ka nongbah Besancon, jong ka France bad nalor ba ka shah khi lyndum, hynrei ka la mynsaw ruh, ha ka jingshah shoh shah bom, kaba la jhor.

U Gerald Darmanin, myntri kam poh iing jong ka France, u thoh ha ka twitter jongu, “Ka la shah khi lyndum, ba ka ieid ia u samla Khristan” bad la iathuh ba kiba ha iing jongka, kin shah tian bishar, halor katei ka jingleh bein jongki, ia katei ka samla.

La iathuh ba kitei ki arngut, ki ia shong ia sah lang marjan, hadien ba ba katei ka samla, ka wan poi sha France, na Bosnia-Herzegovina, la ar snem mynshwa. Ka Margaret Parietti, kaba dei ka Deputy prosecutor, ka iathuh ba kitei ki la ia ieid la khamslem, hynrei, haba ki la dei ban ia poi kha noh, kiba ha iing jong ka kynthei, ki la khang arti arjat, da kaba ong “Ngi dei ki Msulim, kumta, phim lah ban ia poi kha bad U Khristan”.

Mynta ki bor sorkar ka France, ki la shimti ia katei ka thei samla bad ki la kem ruh ia kiba ha iing jong katei ka samla bad ka sorkar jong ka France, ka la ai ia ka jingiada kaba biang ia katei ka samla bad la khang ruh ia kiba ha iing jongka, ba kin dang ia kynduh ia katei ka samla, ha ki sngi ki ban wan.