Ka jingiasngewthuh jingmut ban pynbeit ia u pud Megha-Assam:Sonowal

Shillong, 26 Jymmang: U Myntri Rang bah thymmai ka jylla Assam u Sarbananda Sonowal ha kane ka sngi Palei u la ong ba ka long kaba donkam ban don ka jingiasngewthuh jingmut ban pynbeit ia u pud u sam hapdeng ka Meghalaya bad ka Assam. U la ong ka jingsahteng bun snem, ka la donkam ban pynbeit ia ki jingleh bakla jong kine ki ar tylli ki jylla, la ong u Sonowal.
“Ka jingiasyllok markylliang ka dei ka lynti bah ia ka Assam, Megha laya bad kiwei ki jylla ka dong mihngi ban pynsted ia ka jingiakajia pud”, la ong u Sonowal haba kren mynta ka sngi sha ki lad pathai khubor ha Shillong.
U  Sonowal u la ong ba kano kano kaba donkam ban leh lyngba ka jingiasyllok ka long kaba kongsan ban pynkhlain ia ka jingiadei jong baroh ki jylla ka dong mihngi ban wanrah ia ka roi ka par kaba khlain.
Ka jingiakajia pud hapdeng ka Meghalaya bad ka Assam ka la neh slem bah naduh mynshwa bad ki sorkar barim khamtam ki sorkar Congress na Meghalaya bad na Assam kim shym la lah ban poi sha ka thong watla, u Myntri Rangbah ka Meghalaya u Dr Mukul Sangma ula kular ban pynbeit noh ia u pud u sam tang hapoh 45 sngi hadien ba la shimti ia ka kam myntri rangbah ha u snem 2010.
Ka jingiapher jong ki sorkar ha ki jylla kam dei ka jingeh ban pynbeit ia u pud u sam. “Kano kano lah ban pynbeit lyngba ka jingiasyllok. Kane ka dei kam iing bad kum ka jylla jong kane ka dong mihngi, ngin trei ban wad ia ki lad ki lynti ban weng ia ki mat ba sahteng slem bah”, la ong u Sonowal bad bynrap, ka jingiakren kan long bad u Myntri Rangbah ka Meghalaya ban wad ia ki lynti ban weng ia ka jingeh.Ka jingiasngewthuh jingmut ka dei ban long ka mynsiem jong baroh ki jylla ka dong mihngi ban pynkhlain ia ka kyrdan jong ki jylla ka dong mihngi ha ka ri.