Ka jingiasam konstitwensi, kam pat poi hapdeng ka HSPDP bad UDP

Shillong, 26 Jymmang:
Ka jingiasam konstitwensi hapdeng ka HSPDP bad ka UDP kam pat poi satia hynrei ka dang shu don tang ka jingiakren ban ia treilang ha ka elekshon 2018, hynrei ki kynrum kynram ki la sdang ban mih da kaba pynduh pyndam shuwa ia ka UDP Nongkrem. Kitei ki kynrum kynram ki la sdang mih ruh ha Mylliem konstitwensi ha kaba ki lad khubor ki la iathuh ba u bah Hamlet Dohling ka UDP un ym shong da lei lei ruh ban ailad ia ka kong Teilinia Thangkhiew.
Haba ia kren bad u bah Hamlet Dohling u la ong ba haduh mynta um pat kwah ban ong eie namar ka jingiakren hapdeng ka HSPDP bad ka UDP kam pat poi sha kaba kut hynrei ka dei tang ka jingsdang. Hynrei ki lad khubor ki la iathuh ba utei u kyrtong ka UDP na Mylliem ha u 2013 u la pynkhreh bha ialade ban ia khun ha u 2018 bad la ong ba watla kan don ka jingisam konstitwensi hapdeng ka UDP bad HSPDP bad watla kan mih ka rai ba ka UDP na Mylliem ka dei ban shongthait noh ban ailad ia ka HSPDP kaba don ia ka MDC , u ba hHamlet un ym shong satia bad un ia khun beit ha ka elekshon.
Ka khubor na u briew ba iajan eh bad u bah Hamlet ka la ong ba u dei u briew uba la trei la 5 ne 6 snem mynta wat hadien ka jingshah rem ruh bad kam don jingmut ia u ban shong. Shuh shuh u la ong ba ki nongmihkhmat kiba jop ki khlem trei kumba trei ma u man ka sngi bad u la ong ba ka Mylliem konstitwensi ka donkam ia u briew uba smat. La pyrshang ban ia kren bad u MDC ka Mawthadraishan u bah Blanding Warjri hato u ailad ne-em ia ka UDP kaba mihkhmat da u bah Brol hynrei utei ruh u la ong ba um pat kwah kren eiei mynta.
KI lad khubor ki la iathuh ba ki don haduh 7 tylli ki konstitwensi kiba ka HSPDP bad ka UDP kin shem jingeh bam shim rai lada jia ba mih ka jingiasam konstitwensi bad kitei ki long ka Mawkynrew kaba u MLA u bah Remington Pyngrope u dei na ka seng UDP bad ka HSPDP hangtei ka don ia u bah Martle Mukhim, Nongkrem ka UDP ka don u MDC u bah H.S Shylla katba ka HSPDP ka don ia u MLA u bah Ardent M Basaiawmoit, ka Sohra ka UDP ka don ia u MLA u bah Titos W Chyne katba ka HSPDP ka don ia u bah Droi Khongsti uba la iaid shakhmat, ka Mylliem ka HSPDP ka don ia ka MDC kong Teilinia Thangkhiew katba ka UDP ka don ia u bah Hamlet Dohling, ka Mawthadraishan ka UDP ka don ia u bah Brolding Nongsiej MLA katba ka HSPDP ka don u MDC bah Blanding Warjri bad ka Mawkyrwat ka dei kawei pat ka konstitwensi kaba kitei ki ar seng ki la trei bha mynta.