Nongstoiñ: U Myntri ka kam pynroi sor jong ka sorkar Jylla u bah Hamletson Dohling mynta ka sngi, u la hiar kyndit kyndit sha ka shnong Langpih bad katei ka jingleit hiar kyndit jong u tei u Myntri sha Langpih ka long na ka bynta ban leit jngoh kyrpang ia katei ka thaiñ bad ruh ban sngap ia ki jingeh ba ki paidbah nongshong shnong jong katei ka thaiñ ki don ban pynsngew ha u kum u Myntri sorkar.
U-bah-Hamletson-Dohling-Myntri-kam-pynroi-sor-ka-sorkar-Jylla-lem-bad-u-MLA-ka-Rambrai-bah-Kimfa-Marbaniang-ha-ka-jingjurip-ia-ka-Langpih.
Hadien ba u tei u Myntri u la dep ban jurip bad leit jngoh ia ka Iew ha Langpih, la ioh ruh ban pynlong ia ka jingialang kaba lyngkot hapoh ka phyllaw jong ka skul Raidmynsaw UP School Langpih, ha kaba la wan ban iashim bynta lang da baroh ki nongshong shnong katei ka thaiñ, naduh u bah Hindro Samakha u ba long u wei na ki riew rangbah ba la paw khmat bha jong ka thaiñ Langpih, u Paiem P. Syiem Syiem ka Hima Nongmynsaw, ki Sordar shnong jong ki shnong bapher bapher katei ka thaiñ, ki Sengbhalang bad kiwei kiwei kiba la ioh ban pynsngew ia shibun ki jingeh ba kum ki nongshong shnong ki iakynduh.
Na ka liang jong u bah Hamletson Dohling haba ai jingkren ha katei ka jingialang u la ong ba ka jingwan ka jong u sha Langpih kam dei shuh ka sien kaba nyngkong, namar ha ki por kiba kham mynshwa u la ju wan sha Langpih kum u wei na ki nongialam jong ka Seng KSU, hynrei mynta pat u la wan poi biang kum u Myntri Sorkar ban wan jngoh ia ka thaiñ Langpih bad u la iathuh ruh ba ka jingwan ka jong u ha katei ka sngi sha Langpih kam shym don kano kano ka jingshah pynbor hano re hano lane ka jingshah khot sngewbha hano hano hynrei u la ong ba u kwah ban wan namar ba ka snam jong ki saw ngut ki para ri ki paradoh para snam kaba la jaw ha u snem 2010 ka ud ha u kum u nongialam.
“Ki saw ngut ki rangbah bad samla kiba la khlad noh ha u snem 2010 na ka jingsynreit kuli jong ka sorkar Assam bad kum u briew ba don ia ka ka jingieid ia ka Ri bad ka Jaitbynriew ngam lah ban shu sngap kumto bad katei ka jingiap ka jong ki, ngim kwah ba kan shu long leh noh ei bad ka wan ban pasiaw ha ka dohnud jong nga ha ki tyllong skhor ki jong nga ba nga dei ban wan shapoh Langpih namar nga tip ba ki nongshong shnong ha Langpih ki don hapdeng ka jinglynga jingpisa ka jingjynjar bad ka jingbym shong suk shong saiñ bad kam long ia nga ba ngan shu sngap kumto khlem da wan jngoh da la ki jong ki khmat bad ban shah skhor ia ki jingpynsngew jong ki paidbah ha kane ka sngi kaba mynta” ong u bah Dohling.
Shuh shuh u la ong ruh ba ka jingeh jong ka thaiñ Langpih kam dei shuh kaba dang thymmai, hynrei ka dei kaba la slem bah bad u la pynpaw ruh ia ka jingsngew donbok ba u Blei nongbuh nongthaw u la plie lad ia u ban jop ia ka ilekshon bad long ruh kum u Myntri sorkar ban wan sngap biang ia ki jingeh ba ki paidbah ka thaiñ Langpih ki iakynduh bad u la ong ruh ba u la ioh sngew ia shibun kiei kiei ba la pynpaw da u wei na ki rangbah ka thaiñ Langpih u bah Hindro Samakha, kumta na ka liang jong u kum u Myntri sorkar u la kular ba un sa rah ia kitei ki jingpynsngew jong ki paidbah sha ka sorkar Jylla da kaba u lah ba lum u nongmih khmat u don ia ka jingiadei kaba jan bad ka thaiñ Langpih bad ym tang ia ka Langpih, hynrei ia baroh ki shnong khappud jong ka Jylla hi baroh kawei namar ha ka por jinglong nongialam jong ka KSU u la sakhi ia shibun ki jingeh jingjynjar ba ki paidbah ka thaiñ khappud ki iakynduh.
“U pud u sam u ba ngi ia ud baroh shi katta ym pat lah ban ia pynbeit bad 46 snem ngi la ioh ia la ka jong ka Jylla, hynrei ngim pat don ia u pud u sam u ba biang namar ban ia pynbeit ia u pud u sam u ba biang hi kidon shibun ki jingeh namar ki sohkyrdot kiba bun bad na ka liang jong ka sorkar ruh kan nym lah ban weng bad law noh ia kitei ki sohkyrdot mynta mynta bad nga ngam kwah ban ai ia ka jingkular ia kaba ngam lah ban leh hynrei nga kular ban shimkhia suki pa suki namar ban ia pynbeit ia u pud u sam kidon shibun ki lad ki lynti kiba ngi lah ban leh bad ban shu iakren paidbah yn nym lah ban pynpaw baroh bad ngi ruh ngim kwah ba kan shu long sah kumjuh shi kumjuh namar ba lada ym don u pud u sam u ba biang mih ki jingiaklumar mih ki jingia um snam bad ka jingiaiap briew bad ngi na ka liang jong ka sorkar ngin sa ia pynbeit ban khot ia baroh ki sordar bad riew rangbah ka thaiñ Langpih ha ryngkat u MLA ban iamir jingmut” ong biang u bah Dohling.
Ha kaba iadei pat bad ka roi ka par u la ong ba kala don ka jingiakren sngewthuh hapdeng ki ar sorkar kata ka Meghalaya bad Assam kaba la ong ba ym dei ban pynwit lada wan kino kino ki jingpynroi ha katei ka thaiñ la ka long na Assam ne Meghalaya, hynrei ngi ioh sngew pat lyngba ka jingiathuh jong ki rangbah bad ruh na u MLA ba ka don ka jingshah pynthut ha ka Assam haba pyrshang ban pyntrei ia kino kino ki kam pynroi ba wan na ka sorkar Meghalaya katba ia ka roi ka par kaba wan na ka sorkar Assam pat ka long kaba biang beit bad ha kaba iadei bad katei ka bynta u la ong ba lada ka sorkar Assam ka burom ia ka jingia pynbeit ngi ruh ngin burom lang bad lada ka Assam kam burom balei ngim burom tang ma ngi bad kane kam jia tang ha Langpih hynrei sha kiwei ki jaka khappud ruh ka jia bad ha kaba iadei katei ka jingshah pynthut ki kam pynroi, u la iathuh ba ma u ha ryngkat u MLA ka Rambrai kin sa leit ban iakren bad u DC jong ka West Khasi Hills.
Ha kaba iadei bad ka shong suk shong shngaiñ pat u la ong ba ia ki paidbah kiba im ha ki shnong khappud dei ban don ka jingiada kaba kham kyrpang bad ka jingkwah jong ki paidbah ki Sengbhalang bad kumjuh u MLA ka long ba ka Langpih kadei ban ioh noh ia ka Police Outpost kaba pura, namar kaba don mynta kadei tang ka iing dara kaba shipor bad ka Police Outpost kaba pura ka long kaba donkam palat ban don noh kumta u tei u Myntri u la kular sha ki paidbah ka thaiñ Langpih ba un sa leit ban iakynduh kyrpang ia u Myntri ka kam poh iing jong ka Sorkar Jylla ban ong ba ka Langpih kala donkam ban ioh noh ia ka Police Out Post kaba pura.
“Lada baroh ki MLA hapoh ka Iing Dorbar thaw aiñ jong ka Jylla ki ia tylli bad mynjur na ka bynta ka jingialeh ban ioh pynrung noh ia ka ktien Khasi ha ka khyrnit kaba phra bad kumjuh ruh ban ia pynbeit noh ia u pud u sam u ba biang kala donkam ba baroh ki nongmih khmat kin ai lang ia kajuh ka sur khnang ba kan suk ka long dien bad ka pateng ka ban wan” pynkut u bah Dohling.