|
Shillong: Hynnin ka sngi, ka HYC South West Khasi, ka la kynmaw burom ia ka lyngkhuh sngi iap ba 170 jong u Syiem Sngap Sing Syiem u Syiem ka Hima Maharam,ha Mawkyrwat.
 La sdang ia kane ka jing kynmaw burom da ka jingia mareh marathon ha ka por 7baje mynstep bud sa ka jingialehkai Phutbol ball bad ka volleyball ha ka por 10baje mynstep.
Kum ka dak burom ia kane ka sngi kyrpang,ka HYC ka la leit buh syntiew ha u Mot jong une u Syiem uba don ha phyllaw jongka circuit house Mawkyrwat bad ia ka jingialang ba lyngkot la pyniaid da u Samla Donbok Kharlyngdoh uba long u Vice President CEC bad pyn sngew ruh ia ki kam ba radbah jong u Sngap Sing Syiem.
Ia ka jingialang kynmaw burom la pynlong ha ka Hall jong ka ophis DC, ha kaba la pyniaid da u President ka HYC SWKHD Arbok Kharjahrin. La ioh jingkren na u Syiem ka Hima Maharam ba mynta, ki ophisar sorkar, na u President ba Rangbah jong ka Seng u Samla Robertjune Kharrahrin. Ha ka jingkren jong une u nongialam, u la ban ia shibun ki kam kiba une u Syiem u la leh ha kitei ki por bad ruh une u Samla Nongialam u la ai jingmut da kaba ong “U Syiem ka Hima Nongkhlaw u la lah ban lum ban lang ia ki khun ki hajar ka Hima ha ka Lyngkhuh sngi khlad u Tirot Sing Syiem kum ka dak ba un pyntip ia ki long dien shaphang ka jingkhraw ki Syiem jong ngi,te nga ai jingmut ba ha ki snem ban sa wan ka Hima Maharam lyngba u Syiem ba mynta kin shim iaka nuksa na ka Hima Nongkhlaw ba kin lum kin lang ia ki Khun ki Hajar ka Hima Maharam ha kum kane ka sngi ban kynmaw Kyrpang iaki kam ba radbah u Sngap Sing Syiem”.
Ha kane ka sngi la ia donlang u General Secretary barim ka HNLC Bah Cherish Thangkhiew bad ruh ha ka jing kren jong une u Nongialam u la ai ka jingiaroh kaba khraw iaka HYC South West Khasi Hills, kaba la leh ia kaba dei eh ban kynmaw kyrpang ia u Sngap Sing Syiem ha kane ka sngi bad U bah Cherish u la ong”Ka jingialeh kam pat kut, kum ka Jaidbynriew ngin dang pynjur shuh shuh iaka jing iakhun jongngi ba ngin long kynrad ia la ka Ri bad ka Jaidbynriew Hynñiewtrep baroh kawei”.
“Para ri ngim don Ri Hynñiewtrep ar tylli, ngi don tang kane kawei ka Ri Hynñiewtrep ba mynta kumta ka dei iangi baroh ba ngin im sngi ban iada iaka Jaidbynriew lajong na baroh ki liang,la shah khñiot iangi bad ngim pat laitluid ngi dei ban kynmaw ba ka jing ia khun kam pat kut” ong une u Nongialam barim ka HNLC,u la bynrap shuh shuh dakaba ong ”Ngi don ia ki marpoh khyndew lajong kum u dewiong bad kiwei kiwei hynrei ngi ia die tuh ne shalan tuh kane ka dak shynna ka paw ba ngim long laitluid ia la ki jing don jing em.Kum ka Jaidbynriew ngin ym thiah thai halor kine kiei kiei”.
Ha kane ka sngi kyrpang u CEM ka KHADC Bah H.S Shylla kum u kongsan, u la ai ka jingiaroh ia ka HYC kaba la shim ia ka sien jam kaba kit jingmut ban kyrsiew iaka mynta ba kan hikai iaki pateng ban nang wan ba kin kynmaw burom iaki khlawait ka jaidbynriew kiba la pha iaka jing im na ka bynta ka Jaidbynriew Hynñiewtrep baroh kawei,”Ngi long ka Jaidbynriew ba pynmih ia ki shynrang mynsiem haduh mynta mynne ngi dang don ia ki riew ieid Ri kiba mih shakhmat ban iakhun ia ki jingeh jong ka Jaidbynriew Hynñiewtrep,ki Samla ieid Ri ki pan iaka ILP ka ban iada ia ngi na ka jing wan buhai shnong ki mynder ri ka sorkar ka ai daka aiñ khlem bniat ka ban pyniap man iangi u Hynñiewtrep,ngi pan dohkha ngi ioh da u bseiñ u ban klun syndon iaka Jaidbynriew jongngi”ong u CEM.
|