Ka jingialang paidbah ha Patharkhmah, halor ka jingiap u Bah PJ Marbaniang

Nongpoh, 12 Risaw:
Ki riew pawkhmat ka thain Ri-Bhoi sepngi, ki la khot ia ka jingialang paidbah ha ka 14 tarik Risaw ha Patharkhmah ban iakren ia ka jingshah kynnoh bad paw ki kyrteng briew babun na ka thain ha ka jingshah pyniap klep u pulit Bah PJ Marbaniang ha u bnai Kyllalyngkot mynta u snem.
Ki riew rangbah da ka jingsngew khia jur ia ka burom jong ka thaiñ Western Ri Bhoi  ba la kynnoh ruh ba ka don ka jingsuba shah pyniap klep jong u ne u pulit ophisar ha ki katto katne ngut ki riewkhwan myntoi shimet, ki riew pawkhmat kane ka thain kynthup ia u Bah Comfort Doloi bad u Bah Wickly Marwein kin pynlong ia ka jingialang kaba kyrkieh halor katei ka phang ha ka 14 tarik mynta u bnai ha Ingdorbar jong ka Patharkhmah naduh ka por 10 baje mynstep.
Ka jingialang ka kyrmen ia ka jingiashim bynta da ki Rangbah Shnong, ki nongialam sengbhalang, ki nongialam niam bad kiwei kiwei, kyrpang eh na ka bynta ban ia tai ia kane ka jingjah burom jong ka thain hadien ka jingjia kaba sngewsih kaba jia pyrshah ia u tei u heh pulit ophisar.
U Bah Doloi u la iathuh, ba ha kane ka jingialang yn iatai sani halor ka jinglong jingman jong ka jingtohkit kaba la nang iaid shakhmat da ki bor jong ka SIT, ka jingshahkem jong ki 5 ngut kiba la kynnoh donkti ha kane ka jingjia kiba kynthup naduh u BDO ka Jirang Block, ka jingshah ujor ejehar ki nongtreikam ka KHADC, Forest, Taxes bad ki pulit ohphisar bad ruh ka jingdawa jong ka CSWO (Agnes) ban aiti noh ia ka jingtohkit sha ka tnat jong ka CBI.
U la iathuh ruh, ba ka jingthmu ban pynlong ia kane ka jingialang kaba kyrpang ha kane ka thain ka long ruh ban pynsngewthuh paidbah halor ka jingtohkit kaba dang iaid shakhmat da ki bor jong ka SIT, ka jingjia shah pyniap kumba la kynnoh bad ka jingdon bynta ka jingpynlait beain ia ki 32 tylli ki trok kit dewiong lyngba kane ka thain kaba la leh da ki katto katne ngut ki riew shimkabu bad kaba la pynjah burom shikatdei eh ia ka thain Western Ri Bhoi.
U la iathuh, ba ha kane ka jingialang yn iatai sani ruh halor ka jingdonkti jong ki heh ophisar kiba dei peit dei khmieh ia ka bha ka miat, ka roi ka par jong kane ka thain kaba dei ka thain kaba dang sahdien shikatdei eh ha baroh ki liang bad kyrpang eh ban dawa noh mardor na ka sorkar jylla ba kan thung noh da ki ophisar kiba treihok bad treishitom ia la ka kamram kaba la bynshet ha ki khnang ba kane ka thain kan kiew lem ha baroh ki liang.