Ka jingiaieit jong nga bad ki paidbah ka dang neh: Martle Mukhim

Shillong: Hadien bun bun snem ba u la shah rem ha kiba bun ki elekshon, u bah Martle Mukhim mynta ka kynti u la lah ban jop ha kane ka elekshon MDC 2019 na ka Party HSPDP na Mawkynrew konstitwensi. U bah Martle u dei u MLA bad MDC barim jong katei ka thaiñ na Dienglieng konstitwensi hynrei hadien ba la pynduh noh ia ka Dienglieng bad ba la wanrah da ka Mawkynrew u bah Martle um ju jop elekshon shuh bad dei tang mynta ka kynti ba u la jop da kaba pynliem ia ka kong Amanda Pakynteiñ ka lok jong u myntri sorkar u bah Banteidor Lyngdoh.
U bah Martle u la shongshit bha ha madan Polo, hadien ba u la tip ia ka jingjop bad haba ia kren bad ki nongthohkhubor u la ong ba ka jingjop jong u ka dei namar ba haduh mynta ka dang neh ia ka jingiaieit jong u bad ki paidbah. “Ka jingiaieit jong nga bad ki paidbah ka la neh la slem slem bah bad haduh mynta ruh ka dang neh” u la ong. “Ha manla ki khep ba nga rem elekshon hadien katto katne por ki paidbah ki ju wan beit sha nga bad ki babe ba ki pynrem ia nga hynrei ngat ia ka jingieit u paidbah bad u paidbah ruh u bat ia ka jingieit jong nga” ong biang u bah heh Mar uba ki ju khot ieit sha katei ka thaiñ.

U la ong ba ka jingieit jong u bad ki paidbah ka dei baroh shirta hynrei haba wan ka elekshon u ong ba ki paidbah ki kulmar jingmut noh naba ka long kumba shah lynthem da u maw ha ka bor ka pisa. “Haba wan ka elekshon ka la long beit kumba ki paidbah ki shah lynthem da u maw bad ki klet ia nga hynrei da lah kut ka elekshon ki ju kynmaw ia nga, ngan ai kajuh ka jingieit ia ki paidbah kumba nga ju leh baroh shi katta” u la ong. U la kdew ba ki bunbah ki kam ba ka District Council ka hap ban leh bad ma u ruh un ialeh kumno ban pynbit ban pynbiang ia baroh ki jingdonkam.