Ka jinghiar ka ioh ka kot, dei na ka pakhang shnong ba la pyrkhing palat, ther ka Supreme Court ia ka sorkar India

Ka Supreme Court, mynta ka sngi, ka la sangah tyngeh ia ka sorkar India, da kaba ong ba ka jinghiar ka ioh ka kot ha ka Ri, ka dei namar ka jing pynjari ia ka pakhang shnong kaba pyrkhing shi katdei eh ha ka Ri baroh kawei.

Haba tuklar ia ka phang jong ka jing map ram, ki nong bishar, ba kynthup ia U Justice Ashok Bhushan bad U MR Shah, ki dawa na ka sorkar India, ba kan kren shai halor ka jingthmu jongka, halor ka jing map ram bad balei ba ka buhteng ruh ban phah ia ki jingtip, kiba dei bad katei ka kam sha ka kashari.

Ka Supreme Court, ka ong “Kren shai ia ka jingmut jongphi. Phi kynnoh tang ia ka RBI, ba ka la shim ia ka rai, ngi la peit ia ki rai jong ka RBI, hynrei ka sorkar India, ka rieh pynban ialade hadien ka RBI”.

U Kapil Sibal, u nong ia said ba rangbah, ula ong ba ka jingmap ram, ka kut ha ka 31tarik Nailar 2020, hynrei naduh ka 1tarik Nailur, ngin hap siew ram bad kine ki ram, kin sa kylla long lut ki NPA bad hangta kan nang mih ka jingeh kaba khraw shi katdei.

U Sibal, u dawa namarkata, ba dei ban iai bteng ban map ia ki nongshim ram, haduh ban ia beit lut ia ki mat bapher, hynrei U Tushar Mehta, Solicitor General ka sorkar India, u iathuh ba ka jingbam ram jong ka RBI, ka dei na ka bynta hynriew bnai bad katei ka kut ha ka 31tarik Nailar 2020.