AIS SUJA
Ka jingduwai balei u Blei um jubab? To ngin ia peit kiei ki daw ba pyllong ia u Blei ba um jubab ia ki jingduwai? Kat kum ka ktien U Blei ngi tip ba kidon ki daw ba u Blei um sngew ne um jubab haba ki briew ki duwai. Katto kattne ki long – Ka jingduwai khlem ka jingngeit, ka jingduwai ne pan bymdei, kaba duwai daka mynsiem arsap, ka jingsngew sarong riewblei, kaba duwai ha u Blei khlem jing ia map parabriew, bad namar baka kadon ka pop.
Halor kine ki mat, to ngin ia peit aiu ka ktien u Blei ka kren. Ka jingduwai khlem jingngeit – u Blei u ong to pan da ka jingngeit khlem artatien eiei ruh em namar uba sngewartatien u long kum ka jingat phyllung ka duriaw. Jacob 1: 6-7. Ka jingpan bymdei -Phi pan te phin ioh diang naba phi pan bymdei khnang ba phin ioh pyllut ha kita ki jingkwah brai jongphi. Jacob 4:3. Kiba sngewriewblei halad- u Jisu u la kren haka pharshi ha kita kiba la shaniah skhem halade ba ki long kiba hok (sngewhok) bad kiba I bein ia kiwei. Arngut kila kiew sha ka Temple ban duwai, uwei u pharisi arsap uwei u nongkhrong. U Pharisi u duwai- Ah Blei nga te ngam long kum kiwei pat ki briew ki bymhok kiba klim kiba ban bor, nga shah jingit, bad nga ai kawei naka 10. U nong khrong pat u duwai- Ah u Blei to isynei ia nga u nongpop dakaba u thep ia la ka kti ha ka shadem. Hangne u Jisu u ong – ia uba pynkhraw ia lade yn pynpoh. Bad ia uba pynpoh ialade yn pynkhraw. Loukas 18: 9 -14.
Sa kawei pat ka bynta – kadei ka jingduwai khlem ka jingiamap parabriew. U Jisu u ong – haba phi kyrpad (duwai) ruh to map la da phi bat sngewsih iano iano, khnang ba u kpa u ba ha bneng un map ia ki ryngkang jongphi. La da phim ia map, u kpa jong phi uba ha bneng ruh un ym map ia ki ryngkang (pop) jong phi. Markos 11: 25-26. Sakawei pat kaba u Briew um ioh jubab dei namar ba u briew u set pop halade. U Blei u ong – haba phi kner la ki kti ngan buh rieh ia ki khmat naphi. Haba phi pyllong shibun ki jingduwai, Ngan ym sngap, ki kti jong phi ki dap daka snam. Isaiah 59:2.
Ki jingbymhok jongphi, ki lapynia khlad noh hapdeng jong phi bad u Blei jong phi. Ki pop jongphi ki la kah ia ki khmat jong U naphi – katba un ymsngew. Isaiah 59:2. Kine haneng ki long kiei kiei ki daw kiba u briew umioh jubab na u Blei haba u duwai. Kumta donkam ka jingpynrit bad kaba phai na ki lynti bymman baroh kumta te u Blei un sngew na bneng haba u Briew um duwai, un map ia ki pop un pynkhiah ruh ia ka Ri. 2 khronikl 7:14.
Haba duwai dei ban duwai daka jingngeit kiei kiei kat kaba phi pan ha ka jingduwai, dakaba ngeit, te phin pdiang. Mathaios 21:22. Sa kawei ka bynta, u Blei u kwah ba kaei kaei ba ngi pan dei ban iai neh ha kata. “Lada phi iaineh ha nga, bad ki ktien jongnga ki iaineh haphi, ia kaei kaei ba phin pan – kan long ia phi. Ioanis 15:7. To ngin phai bad pynrioy ialade ha khmat uta uba donbor baroh daka dohnud ka jingkyllabamut, dakaba phai naki lynti bymman baroh.
Ngin duwai ia ka Ri ia ka jaidbynriew bad u Blei un long kastieh ka jingiada ha kipor ka khlam bad ki Nemsniew bad ki jingeh ba bun jaid kiba wan jia wan hap mynta. U Blei un sngew na bneng un pynkhiah ia ka Ri. Amen
Phi don ban ong eiei?