Ka jingdawa ban wanrah C&RD Block ha Mawhati ka dei kaba don nongrim, ong u Dasakhiatbha Lamare

Nongpoh: U MLA ka Mawhati Constituency, u Bah Dasakhiatbha Lamare, u la ai ia ka jingkyrshan halor ka jingdawa na ki kynhun Sengbhalang bad Nongialam shnong, kiba la dawa na ka sorkar ba ka dei ban wanrah noh ia ka C&RD Block ha Mawhati constituency.

Haba kren sha ki lad pathaikhubor, u Dasakhiatbha Lamare, u la ong ba katei ka jingdawa da ki Sengbhalang bad nongialam shnong ka long kaba don nongrim bad kaba dei ruh ban mynjur.

Kum u nongmihkhmat na katei ka Konstitwensi kaba dang sahdien ha kiba bun ki liang bad khamtam eh na bynta kito ki shnong kiba don shajngai na Umsning C&RD Block, namarkata ka long kaba donkam ban wanrah noh ia ka C&RD Block ha Mawhati, ha kaba ka jingmyntoi kam long tang ia kito ki shnong kiba hap ha Mawhati constituency, hynrei wat ia kito ki shnong kiba hap ha Nongpoh Constituency bad kiba la don jngai na Umling C&RD Block.