Ka jingbym iatylli ki seng riewlum, ka pynlong ia ki seng ri thor ban synshar, ong U bah Robert

Shillong:U kyrtong MP ka kynhun synrop Regional Democratic Alliance (RDA) jong ka UDP bad ka HSPDP, u bah Robertjune Kharjahrin, ula khot ia ka jingiatylli jong ka jaitbynriew ha kane ka kynti ban pynsawa ia ka sur ha ka dorbar bah ha Parliament.

Ka UDP bad ka HSPDP ha kane ka sngi Saitjain, ka la pynlong ia ka jingiatai bad iathir jong ki nongkitkam kine ki ar tylli ki party na Maw kynrew, Nongkrem bad na Mawryngkneng konstitwensi ha Smit, na bynta ban pynkhreh ia ka elekshon MP sha ka Lok Sabha na Shillong Parliamentary constituency.
Haba kren ha kane ka jingialang bad ki nongkitkam, u bah Robertjune u la ong ba kum ka jaitbynriew ka ban sei tang uwei u MP, ka donkam ia ka jingiatylli khnang ban iasaid ia ki mat ki jura jong ka jaitbyn riew. Ki don kumba 40 ngut tam ki MP kiba dei na ka Schedule Tribe ha ka Parliament, bad lada ki iatylli ban pynsngew, kin lah ban thaw pyrthei.

“Ka jingsaindur ia ka RDA jong ka UDP bad ka HSPDP, ka dei ka jingmutdur ba suki suki ki party riewlum kin iatylli lut baroh. Ka jingeh ki jingjynjar ba ka jaitbynriew ka mad, ka dei namar bym don ka jingiatylli kaba janai. Ngin peit tang iano, ngin kynnoh tang iano, ha kaba kut, ngi hap ban ia peit khmat para ma ngi”, la ong u Bah Robertjune.
“Dang lah ban mih uwei u MP nangne uba lah ban iasaid, ban pynkohnguh ia kiwei ki MP ha Parliament, ban ia u MP na seng rithor, u bym lah ban pynngeit tang ia ki para MP kiba na kajuh ka seng”, u la bynrap.
U bah Robertjune uba dei u nongialam barim ka sengbhalang, bad uba la pyndep ia ka kyrdan riew said ain na skulbah NEHU, u la ong ba ka jingbym iatylli ki para seng riewlum, ka la pynlong ia kiwei ki seng nabar jylla ban ioh synshar ha kane ka jylla.
“Lada ki seng riewlum ki iatylli, ha ka MLA, MDC ne ha ka MP, ia ka jylla Meghalaya yn ioh ban synshar hi da ma ngi, katkum ka jingstad bad ka jingshemphang”, u la ong.

Haba pynphai nia ia ka jingkren bad jingkynnoh jong kiwei ba ki seng riewlum kim lah ban leh eiei ha Parliament, u bah Robertjune u la ong, “Ka don ka jingngeit ha ki paidbah ba ym lah shuh ban synshar da ki seng riewlum hynrei ki seng riewlum kim kut tang ha Khanapara, ngi la poi shaduh Delhi. Ka HSPDP ka la pynjop ia u bah Hopingstone Lyngdoh, ia u babu Bajubon, u Prof. GG Swell, bad kiwei. Lada mynshwa, ki lah ban pynjop, hato ma ngi, ngim lah”, la buh jingkylli u kyrtong ka RDA.

Ula maham ba lada ki paidbah kim puson bha, ka jylla kan sa long kum ka Tripura ha kaba ki trai shnong kila kylla rit paid ha kiba nabar. Hynrei wat la ka seng trai ri ka Tripra ka don tang 18 ngut ki MLA, hynrei ka la lah ban pyngkohnguh ia ka sorkar India ba kan iasoi ia ka soskular ba ka sorkar India kan ai ka jingiada bad jingithuh kyrpang ia ki hok tynrai jong ki trai shnong.

“Ngam iohi ban don kano kano ka jingeh ba ngin lah ban synshar hi dalade ialade lada ngi iatylli”, ula bynrap. Ka jingsahkut ki mat ki jura ka jaitbynriew kum ka jingpynrung ia ka ktien Khasi ha ka khyrnit ba phra ka riti synshar ka ri, ka Inner Line Permit, ka dei namar bym ioh ia u MP uba khlain ha Parliament.

“Ailad ia u MP seng riewlum na ka RDA, ban ioh sngew ia ka sur ka jaitbynriew ha Parliament, ym donkam ban iakynnoh iakynthoh”, la ong u bah Robertjune.