Ka jingbuh u Conrad “da ka dur lajong” ha ki kot iarap klas X, ka dei ban myntoi sain pyrthei, ong u heh Congress

Shillong:U nongialam ka Congress u bah Manuel Badwar u la pynrem jur ia ka jingbuh dur u myntri rangbah u Conrad K Sangma ha ka kot iarap ne Guide Book na bynta klas ten, kaba ai kyrteng ka CM Impact Guide Book for Students SSLC Examination 2025. Ia kane ka kot, u myntri rangbah ula pyllait dang shen.

Haba kren mynta ka sngi, u bah Manuel u la ong ba kane ka jingleh u myntri rangbah ka dei ka buit ban myntoi sain pyrthei, ban kyntiew ia ka party lajong da kaba pynshoh ia ki paidbah ia ki samla pule, ba u leh kumne kumtai. U la ong ba ka long kaba donkam ban pynmih ia ka jingpynbna haba pyllait ia kano kano ka skhim ne ia kino kino ki kam ba ka sorkar ka leh hynrei ban buh ia ka dur lade, kam iahap satia.
Ym tang ha kane ka kot, wat ha ki kyrteng jong ki skhim bapher bapher, u myntri rangbah u pyndonkam ban buh da ka dur jong u, kum ka CM Connect.

Kane ka jingshim bad rhah burom jong u myntri rangbah, ka la wanrah ia ka jingkren pyrshah na ki paidbah. Katkum ka rai ka kashari Supreme Court ha 2015, kiba lah ban pyndonkam da ka dur ha ki skhim pynroi, kin dei tang ka President, Prime Minister, bad u Chief Justice of India.

U bah Manuel u la ong ba ka jingleh u myntri rangbah ka long ban pynkhraw ialade ban pynshoh ia ki khynnah kiba dang lung ka jingmut jingpyrkhat. U la ong ba ka jingleh u myntri rangbah ka pyni ba ki ophisar kim don bor shuh bad lehse ki lah ban shah pyniaid ha ki consultant bad ka long kum ka kompeni shimet jong u myntri rangbah da kaba pyndonkam bad shim kabu ia ka bor jong ka sorkar.