“Ka jingbud tdong ia ki Ambulance ne ia ki kali VIP, kaba buh jingma bha”

Shillong:Ka Deputy Commissioner (DC) ka East Khasi Hills Kong R.M Kurbah, ka la kyntu ïa ki paidbah ba ki dei ban long kiba la kloi ban ai jingïarap ïa kiba ngat ha ki jingjia aksident, ym ban lap miet ban ring video ne shondur.

Ïa kane ka Kong R.M Kurbah ka la kren ha jingpynlong ïa ka National Road Safety Month 2024 ban pyn sngewthuh ïa ki paidbah ha kaba ïadei bad ka rukom ñiah kali.
La ong ba ïa ka National Road Safety Month la pynlong da ka tnat District Transport Officer (DTO) East Khasi Hills naduh 12 tarik bad la pynkut ha ka 14 tarik Rymphang ha ka jingdon lang u SP Traffic ka EKH u K Prasad, ki bor district, ki ophisar jong ka ophis DTO bad ki nongïalam jong ki Association ñiah kali na sor bad khap sor.

Na ka liang ka Kong R M Kurbah ka la kyntu ïa paidbah ba ki dei ban long kiba kloi ban ïarap ha ka ban pynkit ïa kiba ngat ha ki jingjia aksident sha ki jaka ai jingsumar ym ban lap miet ban shondur lane ring video.
Na ka liang jong ka kala pynkynmaw ruh ïa ki nongñiah kali ba haba ñiah kali, ki dei ban sngewthuh ba ki buh ïa ki jingim jong kiba shong kali ha ki kti jong ki bad kyntu ba haba ñiah kali dei ban long kiba phikir bha bad ñiah husiar ban lait na kino kino ki jingjia ba sngewsih ha ka por ba ñiah kali.

Katba u SP Traffic ka East Khasi Hills u K Prasad ula pyntip ba ha u snem 2023 tang ha Shillong, kila don kumba 46 tylli ki jingjia takhuh kali bad napdeng kine ki jingjia, haduh 40 tylli ki dei kiba shim ïa ki mynsiem briew.
Na ka liang u SP ula pyntip ba tang ha u bnai Kyllalyngkot 2024, la ïoh jingkheiñ ba ki don haduh 6 tylli ki jingjia ïa tyngkhuh kali bad na kine ki jingjia, 6 ngut ki mynsiem briew kila khlad bad la kumba 13 ngut kila mynsaw jur.
Ula ïathuh ba ki daw ba jia aksiden kidei namar ka jingñiah kali khlem akor bad ka jingshim Overtake khlem da peit bha ha ka por ba ñiah kali.

Kiwei pat ki nongkren kila ban jur halor ka jingbud tdong ïa ki Ambulance ne kali VIP haba don ka jingdheng kali bad ong ba ka jingbud tdong ïa ki Ambulance bad kali VIP ka dei kaba buh jingma bha ïa kiwei pat ki nongñiah kali khamtam kiba wan mar pyrshah ha ka surok.
“Kaei kaban jia lada don kiba mih kynsan ki kali arshaka,” kila ong.

Kila ong ba kane ka jingbud tdong ka dei tang ka jingkhyllew, jingsngew sarong ba tbit ñiah kali bad jingñiah shongshit khlem da pyrkhat pat ba ka lah ban buh jingma ïa kiwei kiba ñiah kali bad kiba iaid lynti.
Ki la kyntu ïa ki nongñiah kali ba kin ym mlien shuh ban bud tdong ïa ki kali siren ïoh ka wanrah ïa ki jingjia ba sngewsih ha ka por ñiah kali.