Ka jingbit ka jaitbynriew, ka wan kham halor, ban ia ka parti, ong u bah Ronnie

Shillong:U MLA bad MDC ka Congress na Mylliem u bah Ronnie V Lyngdoh, u la ong ba ka jingbit jingbiang ka jaitbynriew ka wan kham halor ban ia ka party bad kane ka la pynlong ia ka Congress ban iatreilang bad ka NPP ha Khasi Hills Autonomous District Council (KHADC) hadien ba ka UDP ka la shah kynjat noh shabar.

Haba kren ha ka sngi Balang, u bah Ronnie u la ong, “Ngi la aiti ia ka parti na bynta ka jaitbynriew”. U la bynrap, “Ka jingpynkylla ia ka Khynrit ba Hynriew (Sixth Schedule) ka Riti synshar ka ri, kan ktah ia ka rukom bat khyndew, rukom synshar ha ki shnong ki thaw. Hato ka parti kan kham khraw ban ia ka jaitbynriew. Ai ba ngin sngewthuh ba ka jingiada ia ka jaitbynriew ka kham donkam ban ia ka parti”.

U bah Ronnie uba dei ruh u nongialam liangpyrshah ha ïing dorbar thawaiñ, u la ong ba kampher lada ka jingiakhun jong ki, kan ieng ne kan liem hynrei ki iakhun beit. “La ka jingiakhun jong ngi kan ieng ne em hynrei ngin ieng ha ka nongrim. Ki nongseng ia ka ri, kila shem ba ngi la long kiba bit ban don ka Sixth Schedule bad ka parti ka ieng beit halor kane ka nongrim , jia katba jia”, la ong u bah Ronnie.

Lah ban kdew ba 6 ngut ki MDC ka Congress kila leit ban iatreilang ha ka jingkhot ka NPP ha KHADC hadien ba la pynkhyllem noh ia ka Executive Committee kaba ialam ka UDP hapoh ka jingialam u CEM barim u bah Titosstarwell Chyne.