Ka jing shongsuk, kaba donkam tam, ong U lat thymmai ka Jylla

Shillong,8 Naitung:
U Lat ba thymmai ka jylla U Dr. Krishnan kant Paul , IPS ba la shongthait, ula bam smai smai mynta ka sngi ha khmat ka Chief Justice ka Meghalaya High Court. Ha kane ka sngi bam smai u lat la wan ban sakhi da kiba bun bah ki Myntri sorkar, kynthup ia u Myntri Rangbah u Dr.Mukul Sangma, ki MLA ka jylla, ki heh shipai jong ka tnad shipai bapher bapher bad ki heh ophisar ka jylla.
La kha ia U KK Paul ha ka 6 tarik u Rymphang 1948 bad u dei u pulit IPS ba la shongthait, u lat ba thymmai ka jylla u la don 65 snem karta bad u la leit ban ia soh sha ka tnad pulit IPS ha ka snem 1970, u la dep ban pyndep ia a kyrdan pule MSc (Hons) Ph.D.
Hakatei ka sngi bam smai u lat la pdiang sngewbha ia u da u Myntri Rangbah Dr.Mukul Sangma ha kaba u la pynpaw ia ka jingsngewkmen ia ka jingkloi u lat ban wan shimti ia katei ka shuki kum u nongpeit ia ka jylla. U Mukul haba ai jingkren u la kyrpad ruh ia u lat ba un ai buit ai bor bad ban btin lynti ban peit kumno ka jylla kan nangkiew ha ki liang baroh.
Hadien ba la dep bam smai U KK Paul haba ai jingkren u la ong ba ka jingshong suk bad ka jingshngain jong ka jylla la dei ka ba donkam tam bad kaba long ruh ka lynti jong ka jingkiew shaphrang ha kiba bun ki liang. U Lat u la ong ruh ba kum u lat uba dang shu shimti thymmai ia katei ka shuki un trei katkum ka riti synshar jong ka ri India, ha kaba u la pynpaw ruh ia ki jingkular jong u ba un trei ia katei ka kam naduh mynsiem ryngkat bad ka thong ban pynkiew arted ia kane ka jylla Meghalaya.
Shuh shuh u Lat u la ai jingiaroh ia ka jylla Meghalaya kum ka jylla kaba la itynnad bad kaba riewspah ha ka jinglong tynrai jong ki briew kiba shong hangne , u la pynpaw ruh ba ka jaka sah jong u mynta ka Raj Bhavan ka dei ka jaka kaba donnam kaba la kynjoh sha ka rta kaba 200 snem tam bad ka ing jong ka ka la kot sha ka rta kaba 110 tam. U Lat u la ong ruh ba ha ka jingshakri jong u kum u lat ka thong jong u ka long ban wanrah ia ka jingialong kawei bad ka jingialong ryntih khlem da khein poh ia kiba duk ba suk . “Ka hok jong ki briew khamtam ki ba duk ka long kaba kordor tam” ong u Lat haba ai jingkren uba la ai khublei kyrpang ruh ia Mukul uba la pdiang sngewbha ia u.