U Imran Khan, myntri rangbahduh ka Pakistan, ha ki khyndiat sngi ba ladep, ula ai jingmut ia ki kynthei, ba kin da tap bha ia ka met la jong, ban nym pyni kwah ia ki shynrang. U Imran, u kren ia kitei ki kyntien, na ka daw jong ka jing jyllei ki kam bat tnga jubor ha kine ki sngi, ha kaba U Khan, u ai daw, ba ka jing jyllei kine ki kam bat tnga jubor, ka dei na ka jingriam pyni dohmet than ki kynthei bad kaba pynsmiej ia ki shynrang lane ha ka ktien Muslim, kaba ong “fahashi”.
“Ka jingthmu jong ka purdah lane ka jingtap ia ka dur ka dar ki kynthei, ka dei ban khanglad, na ka jing i kwah brai jong ki shynrang, namar ba kiba bun kim lah shan satia ban ialeh pyrshah ia kata” ula ong.
Halor kitei ki jingkren, ka Jemina Goldsmith, ka tnga nyngkong U Khan, ban jubab ia ka jingkren U Khan, ka sot na ka Quran, ha kaba ka ong “Ong ia ki riewngeit blei, ba kin nym peit pyllew ia la ki khan jongki bad ba kin da thap bha, ia ki jinglong shynrang jongki” Quran 24:31. Ka bor ka shong ha u shynrang” ong ka Jemina. Ka Goldsmith, ka ia shong bad U Imran, naduh u snem 1995 haduh u snem 2004 bad ka ong shuh shuh “U Imran, u dei ban tap da ki jain ia la ki khmat, ym dei ban phah tap jain ia ka kynthei”.
Ka Reham Khan, kaba ia shong bad U Imran, tang shiphew bnai, ha u snem 2015, ka la kynthoh lyngkot, da kaba ong “Ka bha ba un nym kren satia, namar kan long ka jing myntoi ia kiba bun”.
U Imran, ha ka jingkren ha ka prokram telebisho, ula nion tyngeh ia ki kam thadlad jong ki phlim bollywood bad nangta, ula ong shuh shuh ba haba la pyni thadlad ia la ka met ka phad, ki ju mih ar tylli ki jingjot bad kitei ki long, ba ka nang jur ka jing shah bat bor ki kynthei bad nangta, ba ka jur sa ka jing ia phet tnga.
Phi don ban ong eiei?