Ka jing pyndonkam lyer sat khmat, ka dei ban khanglad ia ki nonghikai, ba kin tur sha Secreteriat, ym ban pyn mynsaw, ong ki pulit

Shillong:Ki ar ngut ki heh pulit, haba pyn shai halor ka jing pyndonkam ia ka lyer sat khmat, ha ka jing iakhih jong ki nong hikai Contract, mynta ka sngi, ki la ong ba ka jingpyndon kam ia ki lai tylli ki lyer pynsat khmat (tear gas) ka dei tang ban khanglad ia ki, ba kin rung sha Secretariat, ym ban pyn mynsaw ia ki.

Haba ia kren bad ki lad pathai khu bor, na ka liang u Superintendent of Police (SP City) u bah Vivek Syiem, u la ong ba ki pulit ki la pyndom kam ia ka lyer sat khmat, ka long namar ba ki nonghikai ki khlem sngap shuh ia ka jingkren ki bor pulit bad tur beit beit sha Secretariat bad ban pynpra ia ka jingialang jong ki.
“Ki nonghikai ki la pynkhein ia ka section 144 crpc, da kaba ki la tur sha Secretariat, ka jaka kaba la pynjari ia ka Section 144, khlem kano kano ka jingioh jingbit bad ki pulit bad ki magistrate ki la ialeh ban khang ia ki najan Civil hospital, hynrei ki khlem sngap ia ki”u la bynrap.

Ki la ong ruh “Ngi khlem thombor ia ki nonghikai kynthei, namar kiba tur shakhmat ki dei ki rangbah ki ba kynthup ia ki sengbhalang katba ki longkmie ki wan nadien bad shah bat noh ha IGP”.
Halor ka jingkynnoh ba ym don pulit kynthei ha kane ka jingiakhih, u SP u la ong “Ki pulit kynthei ki don lang ha kato ka jaka bad ki don hapoh ka uniform rongiong bad kiba tur hi ki dei ki rangbah suda, kumta ki la phah da ki pulit shynrang sha khmat ban khang ia ki nonghikai.

U Superintendent of Police (SP) u S.Nongtnger, u la ong “Ki pulit ki kwah tang ban khang lad ia ki nonghikai ban tur sha secretariat, na kata ka daw ki la shu pyndonkam da ka lyer pynsat khmat (tear gas) kaba shu bret ha madan, ki khlem pyndonkam da ki tiar pynsatkhmat, ba shu siat lane khlem pyndonkam ia ki lathi ban lait kano kano ka jingmynsaw “.

“Ki pulit ki shim ka sienjam katkum ka ain bad ngi khlem pyndonkam da ka bor, ha kiwei ki jylla ki pulit ki la pyndonkam da ki lathi, hynrei ngi hangne ngi burom ia ki nonghikai na kata ka daw ngi khlem pynmynsaw ia ki bad ngi la pyndonkam da ka teargas tang ban khang ia ki ba kin rung ha Secretariat”.