Ka jing pynbeit pud, kat kum ka jingdon ki kot ki sla, ong U CEM

Shillong:U Chief Executive Member (CEM) jong ka Khasi Hills Autonomous District Council (KHADC), u bah Titos W Chyne, u iathuh ba ka District Council kan ieng ha ka nongrim ba ka jingpynbeit ia u pud u sam hapdeng ka jylla Meghalaya bad ka jylla Assam ka dei ban long kat kum ki jingdon jong ki kot ki sla ha ka Council.

U bah Chyne u la kren ia kane hadien ba la kut ka jingialang jong ka Boundary Commitee jong ka KHADC, kaba la pynlong mynta ka sngi ban ia kren halor ban pyniaid shakhmat ia ka mat ban pynbeit ia u pud u sam hapdeng ka jylla Meghalaya bad Assam.

Haba ia kren bad ki lad pathai khubor, na ka liang u bah Titos W Chyne u CEM ka KHADC u la ong ba ha kane ka jingialang mynta ka sngi la ia kren ba ka District Council kan ieng ha ka nongrim Territorial Right kaba mut ba ngin iaid kat kum ka history kat kum ki kot ki sla kat kum ki map kiba ka District Council ka don.
“Ka Commitee jong ngi kan pynbiang pynbit ia ka kaiphot jong ka, kaba long ka jingpynshisha ia ki kot ki sla halor ka jingkam jong ka jylla ia ki jaka ki ba hap hapoh ka District Council” la ong u CEM.

U la ong ruh ba haba ong ba u pud u sam, hapoh ka District Council, ka long ba ka District Council ka ieng halor u pud u sam jong ka hima, jong ki Khasi state, namar ka jylla Meghalaya ka dang wan hadien, hynrei ka District Council ka la don naduh u snem 1952 kumta ka District Council kan ieng haka ta ka nongrim ba ka jingpynbeit ia u pud u sam hapdeng ka jylla ASsam bad Meghalaya ka dei ban long kat kum ki kot ki sla ki ba ka don.

Ban pyniaid shakhmat ia kane ka jingthmu, jong ka Boundary Commitee ha kaba ia dei bad ka jingpynbeit ia u pud u sam ki dkhot jong ka Commitee ha ka 8 tarik u bnai ban wan kan sa pynlong ia ka jingiakynduh bad ki khlieh Nongsynshar kito ki jaka kiba hap hapoh ka jingiakajia ha Ri Bhoi District bad kum juh ha ka 12 tarik u bnai ban wan ka Commitee kan sa leit ban ia kynduh ia ki khlieh Nongsynshar ka West Khasi Hill ha Nongstoin ban ia kren halor ki jaka ba don ka jingiakajia ha ka ne ka thain.

U CEM u la ong ba hadien kane ka jingiakynduh bad ki khlieh nongsynshar na ka liang ka Commitee kan sa pynbiang pynbit ia ka kaiphot baroh ban leit ban rah hakhmat ka sorkar jylla, shuwa ba kan leit ia kynduh ia ka sorkar Assam ha kaba u CEM, u la ban ia kajuh ba ka sorkar ka dei ban pynthikna ba ka jingiakren ban pynbeit ia u pud u sam, ka dei ban sngap ia ka rai jong ka District Council.