Bah Monarch Shabong
Ha kine ki sngi, ka jing ialeh, na ka bynta ban pynduh jait ia u coronavirus, ka dang iaid shakhmat bad katei kan bteng haduh ka 14tarik Iaiong 2020; hynrei, la iohi, kumba ka jingialeh virus, kan nang kynjah noh, namar ba ka la wan noh sa ka donation virus bad kata ka long ka jing ia mih ban noh synniang ban iakhun virus bad don kiba la noh T.1klur, don kiba la noh T.1lak, don kiba la noh da ka tulop bad ngi iohi ba ki MLA ruh, ki la ia rai ban ia noh mar T.25lak marwei bad nangta sa ki MDC mar T.10lak.
Don shibun kiba ia thab kti, haba ki iohi ia katei ka jing ia noh synniang bad la pynlong ruh ia ka jing ia shondur sah kynmaw hapdeng u myntri rangbah ka Jylla bad shibun kiba kylluid mynsiem, ban ia pynnoh pisa sha ka pla iarap jong u myntri rangbah.
Hynrei, ngi hap ban kynmaw, ba katei ka pisa, kan shong shwa ha pla jong u myntri rangbah bad kan nym pat iaid shano shano ruh, katba ka jing pyrta kaba pyn pang nud bad pyn jaw ummat, ka long na ki lak ngut, ki duk ki raitoi na kylleng ka Ri Khasi Jaintia bad kata ka long ba ki pyrta “Shaei shi shaei u khaw, u dai, u phan” bad kitei ki long ki jingdonkam kiba kyrkieh tasam bad ki ban pynim ia ki lak ki mynsiem briew.
Ha kum kane ka khep, ka long ruh kaba sammut tasam, ba kumno kito ki briew kiba ju iajan bad ia dei bad u paidbah, katba ia la ka jong ka jing ai sngewbha, ba ki leit ai pynban sha pla jong ka sorkar bad katei ka kdew shai, ba ki la klet kloi noh, ia kaei kaba ki ju mlien bha ha ka por elekshon bad kata ka long ban leit sam mar met ia u khaw, ia ki jain, ia ka pisa bad kiwei kiwei sha ki nong thep vote.
Lah ruh ban ong hangne, ba u paidlang ka Ri Khasi Jaintia, u da sniewbok tasam, ba kane ka virus, ka wan jia ha u snem 2020; hynrei ban da jin, ba kan wan jia ha u snem 2022, hangta ki khaw byrni, ki la dap ha man la ki thliew iing bad ki pla sopti ruh, ki la dep da ki kot shispah, shi hajar ter ter.
Ka dei hangne kein ia u paidlang ka Ri Khasi Jaintia, lada u pei shkor, ba un pei syndon hi blait bad kata ka long ba ha kat kane ka khlam bah, hynrei ym don uwei ruh U MLA/MDC lane u kandidet, u ban leit sam pisa sha ki thliew iing jong ki briew, katba ha ka khlam elekshon pat, ki mih da ki spah ngut, ban leit thong da ki phew hajar, na ka bynta kawei ka vote. Shish eh!!
Kaba dei kata, hynrei ynda lah jop election te ym don kam shuh iaka vote bad ki donkam sa iaka nam bad burom, dei hangne kein ba kita ki Mla/Mdc ki sa ia leit bei pisa sha ka sorkar ban ioh ia shohdur lang ban paw ka nam ka burom jong ha khmat u CM.