KA JING NGEIT

AIS SUJA

Ka Jingngeit. Kaei ka jingngeit kat kum ka ktien u Blei? “ka jingngeit ka long kata ka jing sngew skhem ia kita kiei kiei ia kiba ngi kyrmen, kata ka jingtymjuh (test) ia kiei kiei ki bymiohi” Hebru 11:1.

Ka jingngeit (Faith) kalong ka stieh (shield) ban iada na ki sum bameh ding jong u soitan. Ha ka shithi u paul Apostol sha ki Nong Ephesos, u ong: To phin shim ia ka STIEH KA JING NGEIT da kaba phi lah ban pyllip ia ki sum ba mehding jong u bymman (soitan). Ephesos 6:16 U soitan u tip ba lada u briew unduh ia ka jingngeit (faith) tang katta hi u briew u la tlot ka jingiadei bad u Blei. Nakata kadaw u soitan u kwah bantuh na u briew kawei bad kata kadei ka Jingngeit, Bad lada u briew u don ka jingngeit kaba khraw, soitan u khynniuh that that bad u kloi ruh ban phet noh, namar u tieng ba u tip ba u ta u briew u don ka stieh ban iada ialade da kata ka jingngeit kein. Ka jingngeit ha ka ktien u Blei kalong kaba khrawbor katta katta. “Da ka jingngeit ki la ia leit (ki khun Israel) lyngba ka Duriaw Basaw (Red sea) kumba na ryngkew; Ia kaba haba ki nong Egypt ki la pynshna ban beh ki la iap jyllop pynban. Hebru 11:29 “Da ka jingngeit, ka sarah ka la ioh bor ban punkhun wat haba kala palat ka aiom jong ka, naba ka ngeit ha uta uba kalah ban shaniah (ha u Blei) ia uta uba la kular haka. Hebru 11:11. “Da ka jingngeit ngi sngewthuh ba la thaw ia ka pyrthei da ka ktien u Blei”. Hebru 11:3.

Ka don kawei ka riew kynthei kaba don ka jingngeit kaba skhem, ka la leit man ka por ha uwei u Nongbishar ban ud ban kyrpad na u ba un iarap ia kane naka jingshah ban bein jong ka, ka la ong – To leh hok ia nga ne to iarap ia nga ba ngan ioh la ka hok, u Nongbishar um sngap la bunsien ruh. Hynrei ka iai leit sha u da ka jingngeit, khadduh eh, u Nongbishar u ong halade – La ngam sheptieng ia u Blei ruh ne ngam burom ia u briew hynrei ioh ba kata ka kynthei kan wan shi wan ioh ba ngan sngew kyllut to ai ngan pyndep noh ka jingbishar hok ia ka. Bad ka la long shisha kumta. U Jisu u ong lada u Nongbishar bym hok u pyndep ia ka hok kata ka kynthei; katno tam u Blei uba ha bneng un bishar hok ia kita kiba lynniar kyrpad mynmiet bad mynsngi. Loukas 18:1-7.

Kane ka riew kynthei, da ka jingngeit kala iai leit ud ha u Nongbishar bymhok bad kata ka jingngeit jong k aka trei kam dakaba u ta u Nongbishar u la ai ka jingbishar hok halor jongka. Hynrei hangne u Jisu u kylli u ong- ynda lawan u khun u briew (Jisu), un shem ne em ia ka jingngeit (faith) ha ka pyrthei? Loukas 18:8. Ka mut ba tad haduh ka por ba u Jisu unwan pat sha ka pyrthei un shem ne em ia ki briew ba ki don bad iaineh ha kata ka jingngeit? Ngi im ha ka pyrthei ka juk mynta kaba ima I shyrkhei namar bun kita kiba ngeit kaba ha u Jisu Khrist. Ngi im ha ka juh ka jingstad ia kaba u Daniel u la ong ba ka jingstad ka roi haduh ki sngi kiba kut kein. Daniel 12:4. Kane ka juk ka la shaniah ha ka jingstad ba kynja doh, ka jingstad ba kynja mynsiem ka la nang hiar noh. Ka jingngeit kala nang hiar arsut, ka jingngeit ka la sting kum ka dur bula namar ymdon jabieng. Ka daw ka long ba la lynsop ia u briew da kiba bun kiei kiei kiba ha kane ka jingim kaba ha ka doh, ha kane ka pateng ba mynta, kaba ym lah shuh ban batai, kaba lawan lynshop na baroh sawdong ki liang.

Lada u briew ne u bangeit um iaineh u Blei ha kata ka jingngeit kaba ha u Blei ne ha u khun u Blei hapdeng ki eriong ka jingim, katta u briew u lah kut syndon. Nakata kadaw donkam ban bat skhem ia ka Jingngeit ha ka ktien u Blei, namar ka Jingngeit ka long ka stieh ban iada ialade na ki bor ka jingdum, ki buit jong u soitan.

Ngi im ha ki sngi kiba eh, ki sngi khadduh (endtimes), lada ka jingngeit ha u Blei bad ha ka ktien jong u kamdon, kandon ka jingkyllon kaba khraw jong ka jingim. Ki briew kiba mynshwa ki khlain ka jingngeit ban ia kiba mynta nakata ka daw u Jisu kum u Blei u la iohi lypa ia kane ka juk bad tad ynda un wan pat sha kane ka pyrthei – un shem ne em iaka Jingngeit haka pyrthei – ka jingngeit kaba ha ka kyrteng u Jisu Khrist kein.

U Blei u ieh hanga haphi ki nongpule ia kane ka Jingkylli bakhraw ba ngin jubab halade – “Un shem ne em ia ka Jingngeit ha ka pyrthei?” Loukas 18:8. Hato ngi la nang ioh bor ha ka Jingngeit ne ngi la nang duh bor ha ka Jingngeit. !.