Shillong: U Lamphang ka ingdorbar thawain u bah Metbah Lyngdoh, u la ai jingmut ia ka sorkar jylla ba ha kaba iadei bad ka jingpynbeit noh ia u pud u sam hapdeng ka Assam bad Meghalaya ka dei ban long ha ka jingiahun lang jong ki briew, kiba don bynta khnang ba kane ka rai kan long ka ba lah ban pynbeit noh ia u pud u sam shirta.
“Nga la ong ba kano kano ka rai ka ba ka sorkar kan shim ka dei ban long ha ka jingiahun lang ki briew ba don bynta ha kane khnang ban pynthikna ban weng noh ia kane ka mat ba sahteng da ki phew snem”u la ong ia ki lad pathai khubor.
U bah Metbah u la iathuh ba hyn shisngi, u la leit ia kynduh bad u myntri rangbah ka jylla Assam ban ai khublei ia u halor ka jinglong Myntri rangbah jong u, u la iathuh ba ha kane ka jingiakynduh la don ruh ka jingiakren halor ki mat ki ba la sahteng la bun bun snem mynta.
“Nga la pynsngew halor ki mat ki ba la sah teng la slem khamtam, ha kaba iadei bad ka jingeh jong ki briew ki ba sah ha ki thain khappud,ha ka ba na ka liang u myntri rangbah ka jylla Assam ruh u la pynpaw ia ka jingsngewkhia halor kane ka bynta bad pynpaw ba kin wad ia ki lad ki lynti ban lah ban weng ia lane ka jingeh jong ki briew na baroh arliang” u la bynrap.
U bah Lyngdoh u la ai jingmut ia ka sorkar jylla ba lada ka shim ia kano kano ka rai ha kaba iadei bad ka jingpynbeit ia u pud u sam ka dei ban long ka jingiahun lang jong ki briew ba don bynta ha kane.
“Bun na ka liang jong ki myntri rangbah ba rim ki la shim ia ki lad ki lynti ban lah ban pynbeit noh ia u pud u sam hapdeng ka Assam bad ka Meghalaya hynrei ngam tip balei kam shem la poi shaei shaei ruh dei na ka ne ka daw ba nga ai jingmut ba ka jingpynbeit ia u pud u sam ka dei ban long ka ba iabiang lang ha baroh arliang”u la ong.
Phi don ban ong eiei?