Ka jing ia kynad ka Assam, Mizoram, dei kaba la kynshoit da ka seng Congress bad ki bor kiba nabar, ong U Rijiju

Ka jing ia kynad hapdeng ka Assam bad ka Mizoram, ka dei kaba la kynshoit, na shabar jong ka Ri, ong u myntri kam ain ka sorkar India, U Kiren Rijiju, mynta ka sngi.

U Rijiju, u ong ba ki don shibun ki buit kiba nabar ri, kiba pynmih ia ka jing ia kynad bad kiba pynmih ia ki jing iakren kiba pynshit iwei ia iwei pat.

U Rijiju, uba dei U MP na Arunachal Pradesh, u ong ba U Narendra Modi, myntri rangbahduh ka Ri, ula kren shai ba ka jingieid jongu, ia ka thain shatei lam mihngi, kaba nylla bad kam dei satia, kaba dei halor ka jingsngew sain pyrthei.

U Rijiju, u ong ba ki MP jong ka seng BJP, kiba na ka thain shatei lam mihngi, ki la ia kynduh ia u myntri rangbahduh bad iakren halor shibun ki mat, ba kynthup ruh ia ka jing ia kynad hapdeng ka Assam bad ka Mizoram, ha kaba ki la ai ruh ia ka dorkhas sha u myntri rangbahduh, halor katei ka jing ia kynad ki ar jylla.

Kitei ki MP, ki kren pyrshah jur ruh, ia ki nongialam jong ka seng Congress, kiba ialam bakla halor kane ka mat. “Shibun ki lad ki lynti ban wan rah ia ka jingshngain u paidbah, la dep shim ha ki khyndiat sngi ba ladep, hynrei ka Congress, ka iai bteng ban pyni ia ka jing ar sap bad ialam bakla, ong ki MP jong ka seng BJP bad kitei ki MP, ki ong shuh shuh “Ngi khot ia ka seng Congress, ba kan nym leh politics ia kane ka kam, kaba khia shibun eh”.