“Ka JHADC kan pynneh pynsah ia ka kolshor ka ri Jaintia”

Jowai, 23 Iaiong:
U Chairman ka Jaintia Hills Autonomous District Council (JHADC) u la ong ba ka jingthaw thymmai ia ka tnad Art and Culture Department hapoh District Council ka Jaintia Hills ka long kyrpang na ka bynta ban pynneh pynsah ia ka Culture, ka Riti ka Dustur ki paid Jaintia kiba kynthup ia ki Pnar bad ki Biate. U Chairman ka JHADC, u ma Arborhima Darnei u la iathuh ia kane ha ka jingkren jong u kum u kongsan ha ka Shad Sukra jong ka Sein Raij Shnong, Wapungshnong ha kane ka sngi Saitjain.
U ma Darnei u la ong ba ka Ri Jaintia naduh ka thain War, shaduh sha thain Saipung ki don ki Culture kiba itynnad bad ka Dustur ka riti kaba pher lada ia nujor bad ka kynhun jait bynriew kylleng ka pyrthei.
U la ong ba dang shen ka JHADC ka la pynkha ia ka tnad Art and Culture bad lyngba kane ka tnad ka JHADC kan ithuh ia baroh ki Cultural program jong ka ri lum Jaintia katkum ki thain ki thain.
Ha kane ka sngi, la iadonlang ruh ka MDC kynthei ba marwei ka JHADC, ka kong Violet Lyngdoh bad ruh u Dolloi ka Elaka Jowai nalor kiwei kiwei de ki nongialam ka Sein Raij Shnong bad Sein Raij Tuber.