Ka JHADC ka dei ban pynbeit ia pud ki Elaka: JYF

Jowai, 21 Rymphang:
Ka Jaintia Youth Federation (JYF) ka la dawa na ka JHADC ba ka dei ban pynbeit noh ia u pud u sam jong ki 18 tylli ki Elaka kiba don ri Lum Jaintia.
Ka JYF ka la pyn paw ia ka jingsngewkhia kaba jur halor ka jingbym biang u pud u sam jong ki Elaka bapher bapher wat lada ka JHADC ka la don la palat 40 snem mynta, kan shym la lah ban pynbeit bad ban pyntikna ia u pud u sam jong ki Elaka.
“Ka jingbymdon u pud u sam uba biang hapdeng ki Elaka, ka wanrah ia ka jingiaknieh pud bad ia khajia hadpeng ki Elaka kiba iadei khappud”, la ong u President ka JYF, u bah Poipynhun Majaw
Ka JYF ka la pyni ia ka nuksa kiba la jia ha ki snem ba la dep ka long kumka Elaka Sutnga bad Elaka Nongkhlieh ha kaba ka la mih ka jingiahuri hura haduh ba ka la paw sha ki lad pathai khubor, kumjuh ruh ka Elaka Raliang ha ka thain Sumerpathorship bad ka Elaka Nongkhlieh ha kaba iadei bad ka Briwar ha kaba ki paidbah kiba ioh bat patta bad Land Holding Certificate ruh ki don kiba ioh recommendation na Pator ka Sumer bad kumjuh na u Daloi ka Elaka Nongkhlieh.
Na ka liang ka JYF ka la kyntu jur ia u Chief Executive Member ka JHADC bad kumjuh ruh ia ki MDC baroh khamtam u EM In charge badei peit ia ki Elaka ba un shimkhia ia kane ka kam khnang ba kan nym mih kano kano ka jingsngewiapher hapdeng ki Elaka bapher bapher.
“Ka long kaba phylla bad wat lada ka JHADC ka la ai sanad ia ki Daloi, hynrei u pud u sam ba tikna jong ka iit ka hima jong ki Daloi kam don satia”, la bynrap utei u nongialam jong ka JYF.