|
Jowai: Na ka bynta ban pynneh pynsah ia ki Dohkha ha ka Wah Myntang, ka Elaka Mynso ha ka sien jam kaba nyngkong, ka la iakut ban pynlong ia kawei ka jaka ha kane ka wah kum ka JAKA TYNGKAI DOHKHA.
Kane ka jaka ka dei naduh ka thwei Lamin haduh ka thwei Slingi, ka jaka kaba don naduh naneng bad sharum ka jingkieng myntang Mynso, kaba ka jingheh kane ka jaka ka long kumba 400 metre eiei ha ka lynter.
Ha kane ka jaka la mana bad khang pyrshah ba ym bit ban khwai, ban pynap jar, ne ban tong ne leh kino kino ki kam ba ialam sha ka jingpyniap ia ki dohkha.
Ka Elaka ka khot namarkata ia ki paid nongshong shnong ka Elaka baroh bad ia kiwei pat ki paralok kiba wan khwai ha ka wah myntang ba kin sngewbha ban burom ia kane ka jingmana, khnang ba kane ka jingthmu kan long kaba jop.
Ka Elaka ka la iakut ruh ban pyntip sha baroh ki nongshongshnong bad ki rawon ban iatrei lang bad ban long kum ki nong ia peitngor lem, bad ban pyntip mardor sha ka Elaka haba phi tip ne iohi ia kiba ialeh pyrshah. Yn ai buskit ruh ia kito ki nongpyntip bad lada jia balap ia kiba pynkhein ia kane ka adong, yn pynshitom ia ki kat kum ka ain, ong ka kyrwoh na U Ma Ning Pan Chairman, uba dei ruh U Acting Dolloi Elaka Mynso bad u Ma Batskhem Myrchiang, Secretary Elaka Mynso.
|