Ka jaka pdiang bad sangeh bus ha Mawiong, ha U 2018

Shillong, 11 Naitung:
U Commissioner ka tnad Transport ka jylla u Bah Israel W Ingty u la ong ba ka sorkar jylla kan pyrshang tyngeh ban pyndep ia ka jaka pdiang bad sangeh bus ne ka Bus terminal ha Mawiong, Shillong ha ka por ba la buh kata ha u snem 2018.
Ia kane ka jaka pdiang bad sangeh bus la mang ai pisa da ka sorkar pdeng ha ka jinglut kaban long 48 klur bad ka dang ioh T.12 klur. “Kumba long haduh mynta ka jingiaid ki kam ki jam ka la poi sha ka 50 percent bad la khmih lynti ba ngin pyndep ha ka por ba la buh thong ha ka 2018”, u la ong.
U Commissioner u la ong ba ka tnad ka la kyntu ia ka sorkar pdeng ba kan pynlait noh ia ka pisa kaba la dang sah sa T.36 klur ka bym pat pynlait bad nalor kane ka la pan shuh namar kam pat biang.
U la ong ba hadien ba ka pyndep ia kane ka jaka sangeh bad pdiang bus, kan pynkham aram ia ka jingkhapngiah jong kane ka nongbah kaba iakynduh jingeh na ka jingsahkut kali kaba syllang bha.
Kane ka jaka pdiang bad sangeh bos kan ngiam kumba 200 tylli ki bus ki trok ha katei ka jaka.