Ka jaka duwai ha jaka ïuh kjat U Thomas Jones

Shillong, 24’lyngkot:
Ka Presbyterian Church of India ( PCI) ka la buh ia u mawnongrim ban tei ia ka jaka duwai kaba kyrpang kaba baroh ki riew ngeit Kristan ki lah ban leit duwai jar jar ha katei ka jaka.
Ia u maw nongrim la buh ha ka sngi saitjaiñ jong ka taiew hajrong u Lum Maw dnung uba don ha ka shnong Kut Madan. Ïa utei u mawnongrim la buh da u Moderator ka Presbyterian Church of India (PCI), Rev.DC Haia ha ryngkat ka jingdonlang ki u Rev GS Lytan Administrative Secretary ka PCI, u Rev DS Sohkhlet Senior executive secretary ka KJP synod sepngi bad kiwei kiwei.
Yn tei ia katei ka jaka duwai kum ka dak ka jing kynmaw burom ia u nongpyn phriang ia ka khubor jong ka Gospel ha kane ka ri Lum Khasi kata u Thomas Jones. La jied ia katei ka jaka namarba ka dei ka jaka ba nyngkong eh ba u Thomas Jones un ïuh kjat ha kane ka ri Khasi shuwa ba un wan sah ha Nongsawlia. Ia katei ka jaka duwai kyrpang yn tip ruh kum ka “Thomas Jones-1 House of prayer”.
U Thomas Jones u la poi sha katei ka jaka ha u snem 1841 bad u la shong la sah hangtei shuwa ba un leit sah ha ka shnong Nongsawlia ha u snem 1842. Ka jingthmu ka PCI ban tei ia katei ka jaka duwai ka long ruh kum ka jingpynkhreh ban rakhe ia ka jingdap 175 snem jong ka jingwan iuh kjat ka Gospel ha kane ka ri Lum Khasi. Ka jinglut jingsep ba la mang baroh ban tei ia katei ka jaka duwai ka long haduh T.19 klur tyngka bad ka jingheh ka jaka ka long haduh 4 akar. Katba na ka bynta ka surok kaba jngai kumba 400 mitar eiei ka PCIka dang pynkhreh ban wad lad jingiarap na ki bor sorkar.
Ha katei ka sngi la don ryngkat ruh u Rev RF Kharkrang, pastor incharge Nongsawlia pastorate, bah TW Chyne, MLA ka Sohra bad kiwei kiwei. La pynïaid ïa ka jingïalang da u rev David T.Lhouvun, senior administrative secretary, bad la pynshongkun ia ka jingialang da ka jingrwai na ka Standing Choir Sohra Mawsmai District bad ka Nongsawlia Presbyterian Church.