Ka jaitbynriew Khasi, ka dei ban ioh shuh ka lad ban nang kiew, ong u heh UDP

Shillong:Mynhynnin ka sngi ka United Democratic Party ka la aiti ia ki jingai jingmut ba kyn thup 8 tylli ki mat halor ka jingpynkhreh ka sorkar ban bishar biang ia ka Reservation Policy.

Ka kynhun na ka UDP ba ialam u Ge neral Secretary, u bah Jemino Mawthoh, ka la aiti ia ka jingai jingmut ha ka Chair person ka expert com mittee on reser vation roster system ka Kong Ampareen Lyngdoh.
Haba kren sha ki lad pathai khubor, u Bah Jemino u la ong ba ka jingai jingmut ka long kaba bha eh ba kan ym ktah shiliang ia kano kano ka jaitbynriew hynrei kaba iapdiang lang baroh.

U General Secretary ka UDP, u la iathuh ba ka chairperson ka la ong ba ia mynta kan ym pat long ban iathuh ia ki jingai jingmut, namar ba yn hap ban rah sha ka Expert Committee ba kan bishar, kaba lah ruh ban khot ia ki nongialam ka UDP ban pynshai halor ki mat ba ka la aiti.
U bah Jemino u la ong ba la ia im lang bad ki Garo la 50 tylli ki snem bad haba bishar lang ia ka Reservation Policy kan ym ktah, hynrei kan wanrah ka jingbha ia ki jaitbynriew riewlum.

U la ong ruh ba ym dei tang ki expert nabar kiba bit, hynrei ha kane ka jylla ruh ki don bad kan bha lada kin don sa kiba na kane ka jylla kiban kham sngewthuh kham bha ia ka jinglong jingman.
Ha kajuh ka por, u Bah Jemino u la ong ba lada iakren halor ka jingbun ne jingduna briew, kan shong ha ka jingstad ka expert committee bad u la ong ba ka jingbishar kam dei eh ban peit tang na ka jingbun briew bad u la ai nuksa, “Lada iakren ia ki OBC ka jingbhah kam ka long 27 percent ha ka ri India hynrei lada shim ia ka jingdon ki nongshong shnong ki dei ban ioh 40 percent ha ka ri India bad lada shim na ka jingdon briew, ka jingioh bhah ia ki OBC ka dei ban kham kiew hynrei ki don kiwei ki nongrim kiba hap ban bishar lang”.

U la ong ba lada ka don ka lad ka jaitbynriew Khasi ka dei ban ioh shuh shuh ka lad ka lynti ban nang kiew.
Halor ka jingbym treh ka VPP ban ai jingmut sha ka sorkar halor ka Reservation Policy, u bah Jemino Mawthoh u la ong ba kan bha ban kylli bad ka shong haka jingstad jongki namar ba lehse ki don ka jingmut kaba kham bha ruh. Na ka liang ka UDP kumba la bthah ka Committee ka la leh ia ka bynta ban ai jingmut halor kane ka mat kaba jwat hadien 50 snem namar ba kam long kaba suk ban shu pynkylla kynsan kynsan khlem da iathir bniah.