Scholar Lawriniang (Nongthliew WKH)
Haba shu peit ïa ki dak pule u khasi naduh A.B.K haduh Y, i kumba kine ki dak kim i don jingmyntoi satia bad kim i shongdor eiei ruh em, hynrei haba ngi la pyrkhat jylliew ban pynshongdor tynrai ïa ka nongrim jong kine ki dak baroh 23 tylli ki don ïa ka dor ba jylliew haduh katta katta ha kaba ngim lah ban pyrkhat satia bad ban shemphang lut ïa ka jingjylliew bad ka jinglong ba maïan jong ki. Bad ki kylla long ruh ki matti sah nam ba kordor tam ha ka jaitbynriew khasi baroh kawei naduh kulong kumah. Ym don ki matti ban kham kordor ha Ri khasi, lait na ki matti ki dak pule A.B.K, ba la pynsah nam da ki longshuwa manshuwa jong ngi ïa kaba ki la ioh pateng na ki sahep phareng.
Lymda dei ba don kine dak pule ngam tip ngin long ki briew kiba kumno? Lah ban ong kin kham shai ki tngaw ki shrieh ban ia ngi lada khlem kine ki dak pule. Kumta ki khraw pyrkhat ka ri khasi ki ba la leit noh ha shwa jong ngi kum U Myllung Soso tham bad kiwei kiwei ki ñiew kordor ïa ki haduh katta katta da ka ba ong ruh ba kine ki dei kita ki “Shikhung ki Matti hangne ha ri Khasi”. Namar dei lyngba kine ki dak pule ba la wanrah ïa u khun ka Bri u hynniewtrep na ka jingdum ka miet sha ka jingshai ka sngi, haba ngi don hapdeng ka ïongngit ngain hynrei tang da kine ki 23 tylli ki dak pule ki la ïaleh pyrshah ïa u lyoh ba mut kah dum bad ki la pynshai kdar ïa ka Ri khasi. Kumta kumba ngi long mynta ngi la long ki briew kiba stad bad ngi la nangkiew sted ruh ha ka jingnang jingstad katba nangiaid ka por. Kane ka pyni ba ki dak pule ki don ia ka bor ban ialeh ïa ka jingdum kumba ju ong: “Tang 23 tylli ki dak pule ka la biang ban ïaleh ïa ki Nongshun”.
Ka jingïalong kawei ki dak pule: Naduh mynnyngkong ba dang sdang ban pynlong ïa ki dak pule, la pynlong bad la thaw ïa ki ha ka jinglong marwei marwei kum ba ngi ïohi mynta, ba u dak “A” u don ha la ka jong bad u dak “B” bad ki ïa jngai u wei ia u wei kim ïa don satia ha kajuh ka jaka, bad lada ngi pule ïa ki ruh ngi hap ban pule u wei u wei, A,B,K, ngim lah ban pule ha kajuh ka por shisien pule “ABK” kumta kine ki don hapdeng ka jingtlot namar ba ki long marwei marwei bad kim lah satia ban ïarap bad ban sei ïa ka jingdum ki briew namar ba ïa lade ki ia long marwei marwei bad ki kylla long ki ba tlot bor.
Hynrei yn leh kumno pat ban pynkhlain ïa ka bor jong ki? Ban pynkhlain ïa ka bor jong ki, ngi donkam ban pynïatylli ha kajuh ka jaka mar syndah. (Nuksa) Da kaba shim ïa u dak M, u dak E, bad u dak I, ban pyndait syndah lang hajuh, bad hadien kata ngi lap pat ba ka la long ban kynnoh ne ba ngin ong “MEI” da ka jingpyndait lang ha syndah ïa kitei ki lai tylli ki dak pule ki pynmih pat ïa ka bor kaba kham khlain bad kaba kham jylliew shuh shuh ban ïa ki. Lada ngi shu pyrkhat ia u dak M ym i don jingmut satia, hynrei lada pyrkhat pat ïa ka kyntien ba la pynlong da ki laitylli ki dak pule kata ka dei k kyntien “MEI” ka la long ka kyntien kaba jylliew jingmut haduh katta katta ban pyrkhat ïa kaba tang kine ki lai tylli ki dak pule ki pynlong ïa kane ka kyntien MEI.
Kumta ka jaitbynriew khasi ruh ka donkam ban long kum ki dak pule, namar ngim long ki jaitbynriew heh paid kum kiwei kiwei ki jaitbynriew ha ka pyrthei, kumta ngi dei ban long kum ki dak pule A.B.K. Mynta ngi ïa long marwei marwei, kumta ngi kylla long kiba tlot bor ha ki liang baroh, hynrei lada ngi la snoh kti ban ïa trei lang kumba ïatrei lang kitei ki dak pule ban ïa don ha syndah iwei ïa iwei ngi jin da la long ka jaitbynriew kaba khlain bor, namar ka jingkhlain hi kam shong eh ha ka jingbun paid hynrei ka shong ha ka jingstad ka jabieng bad ka jingïalong kawei ka jaitbynriew.
Khublei Shibun
Naei ka jaitbynriew khasi ka mih