|
Ngi long ka jaitbynriew ba rit paid lada nujor bad kiwei pat ki jaitbynriew ha ri India hynrei ha ka jaka ban iatylli ngi ia pynpharia pynban da ki jingsngew pher niam balang, ia pher thaiñ, iapher ki seng saiñpyrthei ba ngi bud bad kiwei ki rukom pyniapher. Ka jaitbynriew ba tang shitroh ngi long, ha jaka ban ia tylli pynban ngi pynpharia da ki jingsngew pher ba lai phew jait. Dei ki nongwei bad ki mynder ban ioh shim kabu ia ka jingiapra jong ngi kum shi jaitbynriew. Bun ki ishu ka jaitbynriew ba sah pongding hynrei ym don satia ban iakren bad ban pynlong jingialang ba kyrkieh ban iakren bad ban pyrkhat kumno ban rah ia ka Jaitbynriew sha khmat ba ngin long ka jaitbynriew ba khlaiñ. Lada sha khñiot u para jaitbynriew ha ki nongwei ngim patiaw ban iakren na bynta jong ki. Ngi rah phang iakren pynban ia kaei kaei ban ym rah jingmyntoi tang shi sapit ruh. Ngi la rit paid lupa kum ka jaitbynriew te ka dei ia ngi ban iatylli khnang ba ngin long kiba khlaiñ. Kan myntoi aiu ban phiahnuid jaitbynriew da kaba kynthoh da kaba pynshong nongrim ha ki jingngeit niam ba ngi don. Lada ngi bteng ban pyniapher kumne shaei ka jaitbynriew kan poi? Hato mano ban myntoi lada ngi iaphiah nuid kumne?…
Hato ngi patiaw ban kren ia u pud u Sam, ka hok longtrai ha la ka ri, ka jingkynrei ki kam sniew ba pynjot ia ki samla, ka jingshah knieh jaka ha ki briew ba na bar, ka jingshah kniew ka kamai ka jik bad kiwei ki ban ai jingmyntoi ia ka Jaitbynriew Khasi jong ngi. Ngi smat than ban pynpait pharia toi ngi dei ban iakhun tyngeh kumno ban pyniatylli. Lada para Khasi ngi ia khun kumne to tip ba ngin ym poi shaei shaei hynrei sha trai riat ba ngin ym lah shuh ban kynthih sha jrong. To kum ki ba don jingkit khlieh ngin sahngeh shisyndon ka pynpait pynpra hynrei ngin iatylli kawei ka buit ka bor ban rah ia ka Jaitbynriew Khasi sha ka jaka ba kiwei pat ki jaitbynriew ha sla pyrthei kin bud nuksa na ngi.
Ngi long i jaitbynriew ba rit
To sahngeh pynpait sapit
Ngin iatylli kawei para Khasi
Ban skhem ka hok longtrai ha la ka ri
Khublei
EN Khongwar
|