Scholar Lawriniang, Nongthliew, WKH
Ka jaitbynriew khasi naduh hyndai hynthai kulong kumah ki longshwa man shwa jong ngi ka don ia la ka riti dustur kaba pher na kiwei pat ki jaitbynriew ha ka pyrthei, naduh ka kheiñ kur kheiñ kha ka ai jait ai khong ka sumar iing sumar sem ka rukom ioh pateng pakit ki khun ki kti, ngi don ia ka jingiapher bad kiwei ki jaitbynbriew.
Bad kaba ngi da sngewsarong shisha ka long ba ha ha ka rukom kheiñ kur kheiñ kha ka long ruh kaba ki da kheiñ kyntang bha haduh katta katta bad ki dang pynskhem ia kane ka jutang wat ha khmat u briew U Blei . U khasi u tip ia ka sang ka ma ka ka peit kha peit man, kumta ki da ia thew ia woh bha ha kane ka kam kyntang ioh ba kumno re kumno ka leit ngat ba dang hap ha ka sang ka ma.
Ym tang katta ka don ruh ia ka riam kaba da i shongkun bha khamtam ha ki kynthei khasi bad kaba da i tap lin shisha da ka akor burom na khlieh ha kjat. Bad kawei na ki riam ba ki longkmie tymmen khasi jong ngi ki ju sngewtynnad bad u niew burom eh ka long ka Jainkyrshah Shiliang, Ka jainkyrshah shiliang ka dei kawei na ki nongkynti ba ki kmie ki ai sngewbha ia la ki khun kynthei jong ki. Naduh ba ki sdang ban kynjoh 14 snem rta shaneng ki kmie ki la pynkhreh ia la ki jainkyrshah na ka bynta ki khun kynthei ba kin kup kin phong ha la iing la sem kum ka burom jong ki na khlieh ha kjat.
Ka Jingkordor ka Jainkyrshah: Ka jainkyrshah lada shu peit luk liak kam da i don jingmut jingmyntoi eh haba ia nujor bad kiwei kiwei ki jait jain khamtam leilei ha kane ka juk mynta ba bun ki jait ba bha bad ba remdor. Namar ka long ka jain kaba tad ka bym da rem dor eh haduh katta katta kaba tang 150 lane palat 250 eh ka dor jong ka bad ka long ruh kaba stang kum snep rynsun bad ka bym don bun jait ki stai (Design) kiba bun ki don ia ka juh ka rong bad ka rukom oh shrong ha ka rukom thain ia ki.
Hynrei watla ka long ka jain kaba tad bym rem dor hynrei ka don pat ia ka dor bah ba khraw bad kaba jylliew haduh katta katta, namar dei ha ka jainkyrshah la pynkup ia ka burom ki kynthei khasi ban lait na ka rain ka rem ha iing ha sem ha lynti syngkien. Ka jingphong ki kynthei ia ka jainkyrshah ka dei namar ka jingda jong ki ia la ka burom ka akor, bad ha ka por mynshwa wat ki Kmie ki Kpa ki Kñi ki hynmen para ki ju kynhied ki ju mai ia ki pyrsa para kynthei bym pjong jainkyrshah haba don kiba bun ba lang, kane ka rukom dang don ruh wat haduh mynta ki longiing longsem ba dang leh kumne.
Hynrei katba nangiaid ki sngi pat i kumba kane ka jain kyrshah ka sdang ban duh jait pynban da kaba burom khamtam eh ha ki samla kynthei mynta bun kiba ong ngim sngewtynnad, lane ka wit ka jainkyrshah, don ruh kiba ong ba i kop biej ikop nongkyndong bha lada phong jainkyrshah. Kumta kane ka daw jong ki ka pynlong ba kim tip shuh ban pyndonkam bad niew kamkai noh ia la ka hok longtrai ka long briew man briew bad wat ki longkmie ruh bun kiba la sngewlong standat (Standard) ki klet noh ia kane ka nongkynti ki kmie. Ym i slem shuh ba ka jain kyrshah kan long tang kum ka jain niad kti ha ka juk mynta.
Bad haba ia dei bad kane ka juk mynta ngam kwah ban kren ne bishar bniah iano iano namar kiba bun ba lang hi ki la sakhi da la ki khmat ia ka riam ka beit ka juk mynta, hooid ym baroh kiba long kumta hynrei don bun pat ki ba la long pyrshah ha ka riti dustur khasi ka rukom riam jong ki. Kumta sa shisien nga kyntu ba phin pyndonkam biang ia ka jainkyrshah kaba long ka burom ka ijot jong phi ki kynthei khamtam ha iing ha sem haba don ki kur ki jait ki hynmen para ka i jah burom bha lada ki kynthei kim don ia ka jain kyrshah ha la ka met haba don ki hynmen para shynrang.
Wat klet ia la ka burom ka ijot jong phi,
Dei kane kein ka ban kdup ban ri
Ia ka longbriew man briew jong ngi
U khun u jaitbynriew khasi.
Ieit ia la ka jong burom ia jong kiwei
Khublei shibun
Kumno ki khasi hynrei ki riam ha ka por lehniam lane don ki kam