Nongpoh:Ka jaidbynriew jongngi (Khasi) ka dei ka jaidbynriew kaba im tang ha ka iatan tyllai hapdeng jongngi bad kaba dei ruh ka jaidbynriew kaba ngim ju don ia ka jingsngewnguh, hynrei ngi kloi ban pan bad ngim ju don kata kaba ngin ai ne ban iarap ia kiwei, ong u Bah Paul Lyngdoh, ha ka sngi kaba u la leit ban plie paidbah ia ka Sports Complex ha shnong Mawroh.
Nalorkata, u Bah Paul Lyngdoh, u la ong ruh ba katba nangmih ki sngi, ka jaidbynriew Khasi ka la nanghiar eh ha ka burom akor, ha kaba ka sakhi kaba shai eh halor kata, ka long mynta ka jaidbynriew kam nang ban burom ia kino kino ki briew kiba la leh ia ki kambah na ka bynta ka jaidbynriew, hynrei kin burom ia ki tad ynda haba ki la khlad noh na sla pyrthei bad ha kata ka por kin sa kynmaw burom lane ban leit pyndeng syntiew ia ki.
“Wat ia u Bah Bull N. Lyngdoh, u nongialam ba radbah ka KSU ha ki por kiba u dang im, ki paidbah kim burom lane ban sngewnguh ia ki kam kiba u la leh na bynta ka jaidbynriew, hynrei bun kiba bein ki khoh ia u, pynban haba u la khlad na sla Pyrthei, baroh ki kynmaw burom bad leit pyndeng syntiew ia u” kren diaw u Bah Paul Lyngdoh.
U Bah Paul Lyngdoh, u la ong ba ka long kaba donkam eh ia ka jaidbynriew ba kan kyndit bynriew noh bad kata ka long ba ka dei ban nang ban burom ia kito ki briew ba dang im bad kiba la trei bha ha ka imlang sahlang bad kam myntoi ban burom ia ki haba ki la kyllut ne ym iohi shuh ki khmat bad ynda ki la khlad noh na sla pyrthei.
Im slem Bah Paul