Ka jaidbynriew ka ap jingma na ki myndie ri ban ia ki mynder, ong U President ka KSU

Nongpoh:Ha ki kyntien ai jingkren jong u Samla Lambokstarwell Marngar, President rangbah ka KSU, uba la hiar sha Ri Bhoi, na ka bynta ban pyn skhem ia ki nong kitkam ba thymmai ka Nongpoh Circle, u la ong ba ka jaidbynriew ka ap jingma eh na ki Ingkhong Shyllang mat ne kita ki Myndie ri ban ia kita ki Mynder ri ne ki briew kiba la wan na shabar bad kiba wan buhai shnong hapoh ka bri u Hynniewtrep.

Haba pynshai halor kata, utei u nongialam ba hakhlieh duh jong jong ka KSU, u la ong, ba ia ki Mynder ri kiba wan na kiwei ki jaka, ka long kaba suk eh ban ithuh ia ki, kata naduh ka dur ka dar lem bad ka jonglong jingman jong ki bad uba la pynpaw ia kata ka jingsngewkhia, hadien ba la iohi ba kumba ka long mynta, ka jaidbynriew ka ap jingma na kita ki Ingkhong Shyllangmat ne ki Myndie ri, kiba don ia ka jonglong jingman bad dur ka dar u Khasi, hynrei kiba die pat iala ka jong ka ri.

Shuh shuh, u Samla Lambokstarwell Marngar, u la ong ruh, ba u la kren ia kitei ki kyntien ka dei hadien, ba u la iohi bad lap ba ki la don shibun ki briew na ka jaidbynriew, kiba sngap la long kumba shah set u ryndang haba don kino kino ki jingshah thombor ne shah lehbein ka jaidbynriew, hynrei lada jia ei ei lane shah thap u Mynder ne u bar jylla, kiba kum kitei ki briew, kin ia mih surok ban ia pyrta dawa ia ka hok na bynta kitei kiba shah ktah kti.

Ka KSU kam isih lane don ia kata ka mynsiem ban ibein ia kiwei ki jaidbynriew kiba don hapoh ka jylla, hynrei kiwei ruh kim dei ban thombor ia ka jaidbynriew ka jongngi bad lada kiwei ki pyrshang ban thombor lane pynibor ia ka jaidbynriew, kaba mut ba ka KSU, kam salia ban leh pyrshah ia kiba kum kita ki kam pynibor lada ka long da ka ktien ne da ka kam.

Kiba la donlang ha katei ka sngi ba pynskhem ia kitei ki nongkitkam ka KSU Nongpoh Circle, ki kynthup ia u Samla Biangbor Paliar, Vice-President ka KSU Sengkmie bad uba dei peit ia ka KSU NKHD unit, nangta u Samla Eric A Nongkynrih, Asst.General Secretary KSU Sengkmie, u Samla Ferdynald K Kharkamni, President ka KSU NKHD, u Samla James H Mawphniang, General Secretary NKHD unit, u Samla Lambok Rymbai Vice-president lem bad kiwei pat ki Nongialam ka NKHD unit bad ki dkhot ka Nongpoh Circle.