Ka jaid ka khong U Khasi

Shri Stephan Star Marwein

Ha kane ka pyrthei, ki don ki ain kiba ym lah ban pynkylla da lei lei ruh em, kiba la don lypa, kum ka nuksa ba ka sngi ka dei beit ban mih na mihngi bad ban sep beit sha sepngi. Ia kane ka ain ym lah ban pynkylla da lei lei ruh em, da kaba ong ba ka sngi kan mih noh na sepngi bad kan sep noh sha mihngi. Kumta hi ruh ki jingthung jingtep, ki mrad ki mreng bad kiei kiei baroh kim lah ban wan lane mih sha kane ka pyrthei khlem u symbai. Kumta hi ma ngi ki briew ruh ngim lah ban wan sha kane ka pyrthei khlem u symbai bad ki Kpa jong ngi ki dei ki symbai, ki khun ki kti ki ia syriem ia u symbai la ha ka dur ka dar, ka rynieng ka ryniot bad ha ka jinglong jingman ruh, wat lada kim long thik kumjuh kum u symbai (Kpa) ruh. Te ka dei ba ki khun ki kti kin hiar pateng na u symbai (Shynrang). Te, kumta ki khun ki kti ki dei ban ioh ia ka jaid ka khong jong u Kpa ym jong ka kmie.
Ha ka jingiohi jong nga, ka jaid bynriew jong ngi, lada ka dang iai pynksan ban ai jaid beit sha ka kmie kan sa poi ka por ba ngin sa sah satang ka kyrteng Khasi, hynrei ka dur ka dar ka jinglong jingman ka bym iadei shuh bad ka jong u Khasi Khara, namar balei nga ong kumne, katba nang mih ki sngi kin nang bun kiwei kiwei pat ki jaid bynriew ki ban wan shong shnong hangne ha jyll jong ngi bad ynda kine ki bar jylla ki la ioh ban rung lut wat sha ki nongkyndong ruh, kan don beit ka jingshongkha khleh, ia kane yn ym lah ban khang, namar ia ka jingiaieid jong uno uno u briew ne kano kano ka briew yn ym don ba lah ban khang. Te hangne, namar ba ngi ki Khasi Khara ngi ai jaid sha ka kmie, ki khun jong ka kmie Khasi kaba ioh dei Kpa Bihari, Nepali, Muslim bad kiwei kiwei ki jaidbynriew, ki khun jong kine ruh kin don ia ka dur ka dar bad ka jinglong jong u Kpa jong ki hi, hynrei ka jaid pat jong kine ki khun kan dei jong ki kmie jong ki hi kaba dei ki Khasi Khara. Kine ki khun nongwei kin kam ialade ba ki dei ki Khasi Khara, katba lada shu peit ia ka dur ka dar jong ki pat ym iahap satia bad u Khasi Khara. Hangne kein ngi sa sah satang ka kyrteng Khasi hynrei ym dei shuh ki Khasi shisha. Hangta ngi ki Khasi ngin sa shem ialade ba ngi la jah noh ka jinglong Khasi ha la ka jong ka Ri bad ba ngi sah sa tang ka nam Khasi ym shuh ki Khasi.
Ha ka jingiohi jong nga, ki Khasi kiba la long Khristan ruh ki dei ban shim khia bha ha kane ka liang jong ka jing shongkha shongman ruh nalor jong kiwei kiwei pat ki jinghikai. Ha ka jingiohi jong nga, ka Balang Khristan ha ri Khasi jong ngi ha ka liang ka shongkha shongman ka la shu hikai beit ba u shynrang hadien ba u shongkha ia kano kano ka briew u la dei ban leit ban sah lang beit bad kata ka briew, hynrei ka balang Khristan kam shym lah hikai pat ia uta u shynrang ba u dei ban shim sha lade ia ka jaid ka khong jong ka lok bad ki khun ki kti kiba kha na kata ka briew sha lade hi ba kin ialong kawei ha iing ha sem. U Kpa (Shynrang) yn long u trai jong kata ka iing. U Kpa (Shynrang) u dei ban long u trai ha la ka jong ka iing. Lada khlem da pynkhamti ha u ia ka jaid ka khong jong ka lok bad jong ki khun kumno yn long u Trai halor jong ki. Ka ain jong ka pyrthei ruh ka batai kumta, kano kano ka tiar lane ka jaka ka bym shym la kdew kyrteng ia uno uno u briew, yn ym don ba lah ban kam trai ia kata ka tiar ne ka jaka, hynrei, ia kata ka tiar lane ka jaka kaba ym shah kyrteng hano hano ruh lah ban shu sumar ia ka hynrei ym lah pat ban kam trai ia ka lane ban pynbha (Modify) ia ka. Ha ka jingtip lyngkhot jong nga, u Blei ruh u ithuh ia kano kano ka longiing lyngba u Kpa (Shynrang), kumba ngi ju iohsngew, ka iing u Abraham. U Blei haba u ai ia ka Hukum lane phah kam ruh ia kano kano ka iing, U ong lane kren lyngba u Kpa (Shynrang), lada phi kynmaw, ia ka Hukum kaba nyngkong eh ruh kaba u Blei u la hukum ha ka Kper Eden, u la hukum ia u Adam ym ia ka Im. Nangta pat, ha ka por ba u Blei u phah ban knia ia u Iso ruh, u Blei u la hukum ia u Abraham (Kpa) ym ia ka Sara (Kynthei). Kumta ha ka jingiohi i jong nga ka la dei ka por ba ki Balang Khristan ruh kin ia pyrkhat halor kane ka liang ka shongkha shongman kaba dei ka bynta kaba khraw bha kaba saindur ia ka imlang sahlang hi baroh kawei.