Ka Jaid Bynriew Khasi bad ka ILP

Fabian Lyngdoh
Email:[email protected]
Mobile:9856477068

Ka Jaid bynriew Khasi-Pnar jong ngi ka don ha ka jing pisa-lynga kaba jur. Ka jingsheptieng ia ka jingwan tyllep ki heh paid nabar kadei ka daw kaba khraw tam jong kane ka jing khih pisa. Namarkata, ka don ka jingsngew ba ka Inner Line Permit (ILP) kadei kawei na ki lad ban khang ia kata ka jingwan tyllep ki heh paid. Haduh katno ka ILP ka lah ban iada ia ka jaidbynriew, bad haduh katno kan pynthut ia ka roi ka par ngim pat lah ban tip. Ha ka taiew ba la dep, ha ka jingiaphylliew jingmut bad u Deputy Commissioner, u Superintendent of Police bad u EAC ka Lower Subansiri District ka Arunachal Pradesh, bad ruh ha ka jingiasyllok bad ki Goan Burra, ki member ka Panchayat lem ruh bad ki Buliang kiba dei ki nongsynshar tynrai (traditional heads) jong ka Apatani tribe, ngi shem ba kim lah bad tip shai kumno ka ILP ka la iada ia ka jaid bynriew jong ki. Tang kawei kaba ki lah ban iathuh shai bad kata ka long ba dei ka riti bat khyndew bad ka riti shongkha shongman jong ki kiba la iada ia ka jaid bynriew jong ki haduh mynta. Hapdeng ki Apatani, tang ki khun shynrang ki ioh pateng ia ka khyndew bad ia ka jaid ka kynja. U briew na kawei ka shnong um lah ban thied khyndew bad leit shong ha kawei pat ka shnong wat hapdeng para maki ruh. Lada uwei u briew u shong kurim ia ka briew na kawei pat ka shnong u hap ban wan ialam ia ka sha ka shnong jong u hi namar ka tnga jong u kam don khyndew ha ka shnong jong ka. U non-tribal u lah ban shong kurim ia ka kynthei Apatani tangba u dei ban ialam iaka sha ka ri lajong namar ymdon jaka ban ai ia u hangno hangno ruh. Lada kine ki riti ki dustur jong ki ki khang lad ne em ia ka roi ka par ngim lah ban tip, kaba ngi tip ka long ba ki iada ia ki kum ka jaidbynriew ba kyrpang bad kim shah tyllep ha kiwei pat ki jaidbynriew.
Hapdeng jong ngi ki Khasi, kaba nyngkong eh ka dei ban ngin pynduh shwa ia ka jingarsap(hypocrisy), bad ia ka jingkopia bad jingsarong khlem nongrim. Ngim dei ban sngew sarong ban ong ba ka jaidbynriew jong ngi te kaba kyrpang tam ha sla kane ka pyrthei, ba ngi don ki riti ki dustur kiba paka tam, ba ngi dei kiba hok tam, ba ka niam jong ngi te kaba janai tam, ba ngim ju mane ksuid ia u thlen, ka bih, ka shwar, ka taro, ne ba ka ktien jong ngi te kaba shongblei tam, bad kumta ter ter. Ngi iam bynniaw ba ka jaidbynriew ka don ha thmiet ka riat namar ngim long kiba khraw mynta hynrei ngi shu put ronsing tang ia ka jingkhraw ki longshwa. U Thomas Avebury u ong, ba uta u bym don ei ei ban sngew sarong ialade lait na ka jingkhraw ki longshwa jong u, u long kum u phan uba shongdor tang shapoh ram-ew hynrei iapstai ha ryngkew (he who has nothing to boast of, but his illustrious ancestors is like a potato the only good thing about him lies under ground).
Ia ka jaidbynriew Khasi hyndai la seng nongrim ha ki kur kiba tylli bad ba khlain. Ki kur Khasi mynta te ki sah sa tang ka kyrteng kim don shuh ka pasoh, hynrei dang don pat ka jingsngew sarong kur. Ia ka kam bymman te borobor leh u ne ka kur kiwei, ymdei ba leh u kur jong nga! U kur jong nga te lada u dakaid katno katno ruh ngan hap iada, lada leh dakaid u kur kiwei te ngan pynkit tin! Ka meideng, meiduh ne ka para ka pyrsa jong nga te ki lah ban shongkurim ia u Doctor Panjabi, u Professor Bengali, u Malik Bihari ne u Captain Nepali, lada leh ka kur kiwei te ngan beh shnong artad! Leh business benami ka kmie ne u knie jong nga te ka long ka kam kaba iohnong, leh benami kiwei pat te ani ka la ktah ia ka hok ka jaidbynriew! Na ei ka wan kane ka jingarsap ha kata ka jaid bynriew tip-hok tip-sot, tip-briew tip-blei? Weng noh ia kane ka jing arsap bad ka jingkopia khlem nongrim. Don uba ong,”Ngin lei ia ka lawei lada ngi dei ban khlad noh na ka mynnor”. Tang u tymmen u bym don shuh ka lawei u kren kumta. Ha u khynnah bad u samla bastad te un ong, “Ngi lei ia kata ka mynnor, lada kam tei ia ka mynta bad ka lawei”.
Ha kane ka jaidbynriew jong ngi don ka thma hapdeng kita kiba kham ieid ia ka mynnor ban ia ka lawei, kiba ki khot ki parochial conservationists; bad kita pat kiba la kiew kyrdan palat kiba ki khot ki super elites. Ka jingshisha ka don hapdeng kine ki ar kynhun ialehthma. Ngi iam bynniaw ba ngi rit paid, ngi don tang kumba 100(shispah) ngut ha ka shi square kilo metre, bad ngi tieng ioh ba ngi shah tyllep ha u Bengali uba don palat ia ka 700 ngut shi square kilo metre, ne ha u Assamese uba don palat ia ka 300 ngut ha ka shi square kilo metre, ne ha u South Indian uba don palat ia ka 800 ngut ha ka shi square kilometer. O ka ri India ka la bun briew palat! Ki super elite ki ong ia ki Khasi ban pynduna ne pynduh khun noh khnang ban riewspah bad ban ia stad de. Ne hato ymdei ban ai jaka ia kita kiba lah bunbriew palat ban wan pyndap ia kaba suda? Ngi tieng ba ngi rit paid palat bad kata ka dei ka jingshisha. Ki super elite ki ong, “small family is a happy family”. Mano ba la pynshisha ia kata? Ngi iohi ha ki nongkyndong ba kato ka tymmen kaba la kha 10 ngut ki khun, ka kmen bad ka shngain ba tawiar ia ka da byllai ki khun bad ki ksiew. Haba ngi ong ba ka jaidbynriew ka don ka hok ban iaineh bad iai roi, hato kam dei ka hok ki khun Khasi-Khara ban roi ha ka jingbun paid ruh? Balei la kwah ia ngi ban pynduna bad pynduh khun tang na ka daw ba ka West Bengal, ka Bihar, ka U.P., ka Kerala, ka Assam bad kiwei ki State ki la khapngiah briew? Kano kano ka jaid bynriew kan long kaba khlain bad kaba roi shaprang ha la ka ri, tang lada ka la poi ka jingbun briew ha kata kaba ki economists ki ong ka optimum level. Kata ka mut ba ka jingbunbriew ka ia ryngkat (balance) bad ka area ka khyndew bad ka spah ba don ha ka, ryngkat bad ki lad ki lynti ban kamai katkum ka jaka (location) ba kata ka ri ka don hapdeng kiwei pat ki jaidbynriew. Kawei na ki daw ba khraw tam ban ngin sa shah tyllep ha ki heh paid ka dei ba ngi rit paid, bad namarkata ka don ka jingthylli (vacuum) ha ka imlang ka sahlang. Kawei na ki ain saian ka ong ba ka pyrthei ka mariang ka isih ia ka jingthylli (nature abhors vacuum), bad namarkata ka ialeh ban pyndap hangta. Nga sngewdei ban ong ba ka pyrthei ka mariang ka shah tan ha ka jingthylli (nature is attracted to vacuum). Kata ka jingrung kyrthep u mynder ne ka influx ka wan namar jong kane ka jingthylli. Ka don ka jingduna ki nongtrei (labour vacuum), ka don kyrhai ka kabu ban pynroi ia ki spah mariang bad ki lad ki lynti kamai. Kata ka jingkyrduh kam bashisha kam pat don hapdeng jong ngi ki Khasi. Ka don tang ka jingkyrduh kam tulop bad ka jingkyrduh bai seng ban riewspah, hynrei kam pat don ka jingkyrduh kam bylla ne ka jingkyrduh kam trei bor-met. Ka jingkyrduh-kam bashisha (unemployment) katkum ka economics ka long ba ka jingbunbriew ka la tam ia ka bor bsa jong ka khyndew (natural resources) bad ia ki lad ki lynti ban kamai. Ka mih kata kaba ki ong ka labour market ha kaba ki nongtrei bylla (labourers) ki ia lum khrui ha ki ladshnong (squares) khnang ba ki nongai kam kin leit wer ia ki ban trei. Ka jingthoh ka ong ba don ki nongtrei kiba hap ieng sah hangta ha ladshnong haduh ba la janmiet ka sngi ruh namar ba ymdon ba wer bylla ia ki. Kata kein ka dei ka unemployment bashisha. Ngi ki Khasi ngin lehrain ban ong ba la kyrduh kam, lada dang don byllai bah ka lad ia u bar ri ban die shana, ban die allu-muri, ban suh juti, ban leit shang die jain, die pylleng, die khiew, die dud, die jalebi kylleng ki shnong ki thaw jong ngi. Dang don ruh bun ka lad ia ki khar mistri ban wan shna ia ki ing bad ki surok jong ngi. Kum ka jaid bynriew ngim pat mad ia ka jingkyrduh bad ka lanot bashisha, namarkata ngim pat sngewthuh kiei ki lad kamai bad ki lad jingim ba don ha ka ri jong ngi. Kito kiba wan na ki ri kiba la iakynduh mawsiang ki iohi kliaw kiei ki lad bad kamai hangne. Kane ka dei ka jingthylli (vacuum) kaba da lei lei ngim lah ban ia pyrshah (resist). Pyndap ia kane ka jingthylli dalade lymkumta, ka lyer na ki jaka ba jur ka pressure kan wan niom na baroh sawdong ban wan pyndap bad kan khie ka er-iong er-ngit bad kan rat artad ia ki iing ki sem, ki kur ki jaid jong ngi. Don kiba ong, “kham lah ban don tang khyndiat ki briew kiba la stad ban ia shibun ki briew kiba shu long paidbah” (a handful of quality population) Kata ka dei kaba ki khot ka elitist rhetoric ka bym ia par pain ei ei bad ka jingshisha jong ka mariang. Hato u Blei u la buh ia kane ka ri Khasi, bad u la ialam ia ki longshwa jong ngi sha kane ka ri tang na ka bynta kita ki little quality population? Ka snam bad u symbai jong ka jaidbynriew Hynniew Trep ka don ka hok nyngkong eh ban roi ha ka jing bun briew ha la ka jong ka ri haduh ka optimum level, bad hadien kata sa ia pyrkhat ia kata ka quality ne ia kata ka national population policy. Ka little quality population kam lah ban pyndap ia ka jingthylli. Ka little quality population kan long pynban maka ka ban khring ia u bar ri ban wan haduh iing shetja ne ha jingthiah syndon.
Nalor ka jingdonkam ha ka jingbunbriew, ngi dei ruh ban pdiang ba kane ka rukom longkur longjaid longing longsem jong ngi (matrilineal system) ka la iakynduh mawsiang ha kane ka pyrthei mynta. La dei ban pyrkhat ban wanrah katto katne ki jingkylla ban kham ai bor ia ki khun shynrang bad ban pynlong ruh iaki kiba kitkhlieh. Ngim lah ban len ba kane ka riti jong ngi ka khring bad plie lad ia ki bar ri ym tang ban wan kamai hynrei ban long paduh syndon.
Ha kawei ka jingiania u Bah Donatus Shadap, Syiem Raid Iapngar u la kren khor da ka jing sngew bitar, “kin ym ler kita ki check gate jong phi namar u dkhar u wan rung sha ri Khasi ymdei lyngba ka surok ne ka gate hynrei lyngba ka kynthei”. Ka leit long kumta ymdei namar ba ki kynthei Khasi ki long kiba lyngkar, hynrei namar ba ka jaidbynriew hi baroh kawei ha ki riti ki dustur jong ka, ka la lyngkar. Baroh lang bad kynthei bad shynrang ngin hap ban kit pap lang na ka bynta kano kano ka apot ba ka jaid bynriew kan ngat. Ha kawei ka shnong don hynriew tylli ki long iing kiba ioh kpa da ki Nepali, bad ka daw ka long ba kine ki hynriew ngut ki longkmie ki dei kiba la shah iehnoh ha ki longkpa Khasi. Ha kine ki por la i kumba kane ka riti longkur longjaid ka la kylla ka khohpei ba hap kit ki kynthei, bad ha ki shynrang pat i kumba ka kylla ka license ban iaid pathar khlem jingkitkhlieh. Don ei ei ha lyndet jong kine ki kynrum kynram ia kiba ngi dei ban iatai sani bad ban ia pynbeit. Lymda ngi pynduh noh ka jingarsap, ka jingsarong khlem nongrim bad lymda ngim ia roi paid haduh ka optimum level bad ngim pynbeit ruh ia ka riti shongkha shongman bad longing longsem, ngin sa shah tyllep beit bad ka ILP bad ki check gate kin ym lah iada ei ei.