Ka ishu elekshon ha Chokpot

Shillong, 19 Jylliew: 
Ka roi ka par ka dei ka ishu ba kongsan jong kane ka elekson shiteng samoi ha Chokpot constituency.
Kane ka constituency kaba jngai kumba 60 km na sor Tura, ka dei kawei kaba dang sahdien bha ha kaba ki lad pynroi kim pat ioh lynti bha ban poi sha ki paidbah.
Ia kane ka Chokpot constituency kaba don ha South Garo hills la mihkhmat kum u MLa da u Clifford Marak bad u Masongsing Sangma bam kwai ha duwai u blei.
Ia ka elekshon shi teng samoi la pynlong ha dien ba u MLA u Clifford u la khlad kyndit noh ha une u snem.
Ka elekshon shiteng samoi kan long ha ka 27 tarik mynta u bnai Jylliew ha kaba yn sakhi ia saw ngut ki nongialeh ha kane ka kynti.
U Clifford u la khlad ha ka 27 tarik Lber uba la shah jied na ka Garo National Council (GNC).
Ka lok jong u Clifford ka Kalpana Sangma ka iakhun ha kane ka kynti. Ka Chokpot ka paw nam bha ha ka khaii dewiong, ka don ki khlaw ba rben, ka jaka sah ne reihtngen jong ki lehnoh. Hynnin ka sngi ki pulit ka Meghalaya ki la iasiat mar kylliang bad ki lehnoh ha u lum Durama. Bun bah ki briew ha kane ka thain ki la kwah eh ban ioh ia ka lynti ka synkieng, ka surok namar ba ka dei kawei na ki jingeh ha ka leit ka wan bad ban wanrah ia ka roi ka par. Ka Bluebell Sangma ka iakhun na ka Congress  kaba dei ruh ka lok jong u Masonsing Sangma uba la khlad noh. Ki heh sain pyrthei kynthup u Bah DD Lapang , u  PA Sangma ki la hiar sha katei ka thain ban ialap elekshon. Ki kyrtong ba iakhun ha kane ka kynti ki kynthup ia ka  Bluebell Sangma na Congress, ka Kalpana Sangma na GNC, u Philipole Marak na NPP, bad u Thinkerman Marak kyrtong shimet.