Ka ioh duna bad ka rem dor u khaw reshon

Bah Monarch Shabong

Mynta la shi taiew tam, ngi iohi ba ka kyntien pahuh bam, ka la jah noh na ka shyntur jong ki heh sorkar Jylla bad haba katei ka kyntien, ka la jah, ngi sdang pynban ban ioh sngew sa ki kyntien jing bitar halor ka jing ioh duna khaw bad ka jingoh dor rem ia u khaw.

Kam dei shuh tang ha kawei ka shnong lane ha kawei ka thain, hynrei ka jingjia, ka iai bteng nawei shawei bad kat nang jngai na sor, katta ka jing ia ud bad ujor jong ki paidbah, ka nang jur. Lada iakren ia kane ka mat, ngi iohi ba ki heh sorkar, naduh u myntri rangbah, u myntri rangbah ba ar, ki myntri sorkar jongu, ki ophisar bad kito kiba smat ban trei, ki ia kren beit tang ia ka coronavirus, katba kito ki bym smat lane ioh kiba leh phoi, kitei ki la shu jah jar ialade ngim iohi shuh ia ki syrngiew syrnget jongki.

Ngi la iakren kham mynshwa, ba ka Ri Khasi, ka don ia kawei pat ka virus, kaba kham dakaid bad kata ka long ka jing iap thngan, namar ba kine ki phew lak ngut kiba don ha ki shnong bapher, kin nym iap thngan, namar ba ki don ia u coronavirus, hynrei kin iap thngan, namar ba ki don ha ka kpoh kaba thylli lane ka stomachvirus bad ka dei ruh hangne, ba ka sorkar Jylla, ka la pheil tyngeh.

Ha kaba kum kane ka por, ka jing iakren da ki live video, ki jing bud dien man ka kynta shaphang ka coronavirus, kam da donkam than, hynrei, ka la dei ban don ki pyrman jongka, kiba khlain bor bad kiba tip ia ka jingeh jong ki paidbah bad kumta, lada ia ka coronavirus, ngi lah ban don ia ka helpline number, kumta balei ba ngim lah ban buh sa ka helpline number, na ka bynta ka stomachvirus. Ki don shibun ki seng bhalang, ki mahajon, ki seng niam bapher, kiba lah ban bsa da ki taiew lane kiba lah ban ai ia u khaw, u phan bad kiwei ki jingdonkam sha kito ki riew shem lanot, lada ka sorkar ka mynjur ba kam lah shuh ban teh lakam dalade, hynrei kaba sngewsih ka long ba haduh mynta, ban leh dalade ruh kim kwah bad ban aiti ha kiwei pat ruh kim mon.

Ka sorkar Jylla, ka tip shai ba u khaw reshon jong ka sorkar, un nym lah ban pyndap ia u paidlang jong ka Jylla bad dei ban wad ia ki lad ki lynti halor katei ka phang; hynrei kaba lyngngoh, ka long ba ka tnat sam bam sam dih jong ka sorkar Jylla, haduh mynta, ka shu peit kai narud bad kam kwah ban trei borbah pyrshah ia ka stomachvirus.