Ka ïng mane, kum ka Hospital ha Nongkya

Shillong,30 Jymmang:
Ka ïng mane jong ka Balang U Blei ha Nongkya ka la kylla long kum ka Hospital namar la pynthiah ia ki nongpang bad shabar bad shapoh ing, namar da ki spah ngut ki la kem pang, hadien ba ki la ngat bih na ka bam ha ka sngi u blei jong ka taiew ha ka jingiaseng District jong ka Balang u Blei ha ka balang Nongkya, kaba hap hapoh Mawhati konstitwensi.
U nongthohkhubor u la pyrshang ban wad bniah ban tip ia ka rukom shet naduh ka jaka ot doh ka jaka shet, la iathuh ba la ot doh bad la shet shadien ing mane hi hynrei ym shym la ioh ki khubor kiba tikna naba la ong ba naduh ki Rangbah Shnong, ki Secretary Shnong, ki nongialam balang ki la poi lut sha Hospital. La iathuh ba na ka shnong Nongkya ki la don haduh 6 ngut kiba la iap katba 2 ngut pat na ki ar tylli ki shnong.
U bah James Sylliang MDC ka Mawhati u la iathuh ba tang mar ia ioh jingtip u la leit sha katei ka shnong bad sha ki jaka sumar ba thiah ki nongpang ban leit jngoh ia kitei ki lanot.U la pynpaw ka jingsngewlem halor katei ka jingjia. U MDC ka Umsning u bah Donkupar Sumer ruh u la iathuh ba mar ia ioh jingtip u la leit ban jngoh ia ki nongpang bad ban aiarap ia ki jingdonkam kyrkieh jong ki.