Ka Indira ka ia poi kha bad U Muslim, hynrei ka buhrieh ia ka niam jongka, ong U MP ka BJP

New Delhi: U Parvesh Verma, MP jong ka seng BJP, ula shah khang ha ka elekshon komishon ban kanbas paidbah, namar ba u kren pynshit bad pyn iapher jaitbynriew, ula ong mynta ka sngi, ba U Rajiv Gandhi, dei U ‘Rajiv Feroze Khan’ bad ia katei ula kren ha Parliament.

Haba kren ha ka mat ban ai khublei ia U President ka Ri, ha katei ka iing dorbar, U Verma, u iathuh ba ka Indira, ka la ia poi kha ia U Muslim bad kumta ka iing jong ki Gandhi, ka dei ka iing jong ki Muslim bad kumta ki kwah ban buhrieh ia ka niam ba shisha jongki.

Ka Indira ka ia poi kha ia U Feroze Khan bad ka la kylla sha ka niam Islam bad ka la shim ruh ia ka kyrteng Muslim, hynrei la pynbor da u kpa jongka, U Jawaharlal Nehru bad kan kylla ia ka jait jongka sha ka jait Gandhi bad katei ka la ju long ka mat kaba la ju kren pyrshah da ki dkhot ka seng BJP.

Ha ka jingshisha ka Indira Nehru, ka ia poi kha ia U Feroze Gandhi, uba dei na ka long iing Parsi-Zoroastrian na Allahabad.

U Verma, u kren shai ba ka seng BJP, kan nym weng satia ia ka ain Citizenship Amendment Act, ha kaba u ong “Kane kam dei ka sorkar jong U Rajiv Feroze Khan. Kane ka dei ka sorkar jong U Narendra Modi.”