Ka imlang sahlang, ka la jot thiaw ba jyllei ki nongdih droks

Da U Bah Philip Marwein

Ka thma kaba shyrkhei bad kaba jar jar mynta kaba la wan hiar ha ka imlang sahlang ka dei ka jingdih droks. Ka jingdih droks ka pynjot thiaw ym tang ia u nongdik hynrei ia ka imlang sahlang ruh. Ka pyntroin lut khait ia ka jingim briew baroh phar. Kaba lyngngoh ka long ba ka mynta kiba dih droks ki dei ki shynrang bad ki kynthei la bun bha. Kane ka jingdih droks ka la pynjot lut ia ki iing ki sem bad ka long ka apot sep-sngi da shisha na ka bynta kito ki longiing kiba la ngat ha jingdih droks. Kajuh ka apot ka hap ruh ia kito kiba la ngop ha ka jingdih kyiad ruh, hynrei kaba kham shyrkhei shuh shuh ia kito kiba la ngat ha ka jingdih droks.
Ngam dei uba la jurip bha ia kane ka kam dih droks ha ka jylla, hynrei kito kiba la tih bha shaphang kane, ki iathuh ba ka jingdih drok ha Meghalaya mynta ka la jyllei bha. Ka la pur ha kylleng ka Ri Khasi-Jaintia bad Garo Hills. Ki iathuh ba kiba bun kiba la ngat ha kane ka jingdih ki dei ki samla, wat kiba dang rit rta ruh. Kine ki nongdih drok kim dih tang marwei hynrei ki sngewtynnat ban ialang para nongdih bad ki da muja artat haba iadih lang. Kim sngewtynnat satia ban dih tang marwei. Kine ki ialeh ban ialang paralok, ki wad paralok bad ki iaphyrngop lang ha kane ka jingdih. Kito kiba la mlien bad kiba la kyrni bha ki hikai ia kito kiba dang thymmai kumno ban dih bad nangno ban ioh ia u droks. Ki hikai ruh kumno ban ioh peisa wat lyngba ki lad jong ka thok ka thak, ka tuh ka shukor bad da kaba lute bad pyniap briew, pynkhein ia ki ain har-rukom ruh tang ban ioh thied droks. Kim salia shuh iala ki kmie ki kpa ne ki ba ha iing ruh. Ki brai tang kumno ban ioh droks ban dih bad ynda ki la ioh droks ki sngew kumba ki la ioh lut ia ka jingsngewbha jong ka pyrthei baroh kawei. Kane ka jingdih droks ka ialam lut sha ki kam be-ain kiba sniew, ki jingbrai pyrthei bad kiba ma ha ka imlang sahlang.
Kumta, ka dei ka kamram jong ka imlang sahlang ban pynduh ia kane ka jingsniew namarba tang ki pulit kim lah ban ialeh pyrshah. La donkam da ka jingiatreilang naduh ki longiing longsem, ki bor shnong, ki bor jong ki seng trei mon sngewbha ne seng bhalang, ki seng samla, ki seng longkmie longkpa, ki nongmihkhmat paidbah, ki bor sorkar, ki bor hima, ki bor jong ki kynhun balang bapher bapher bad baroh khoit, kin iasnoh kti lang ban rat dyngkhong ia kane ka jingsniew kaba kynthup ruh ia ka jingdih kyiad buaid tanglang kaba la pynjot la biang ia ka imlang sahlang. Ki la don bun ki lad ki kabu bad ki jinghikai ha ka jylla na ki nonghikai kumno ban lait na u droks bad na ka jingdih droks ia kito ki bym pat ngat ha ka. Nangta, ruh ki la don bun ki lad kumno ban iarap ia kito kiba la ngat ha ka jingdih droks kum kita ki seng Droks Anonymous, ki drugs de-addiction centre bad ki drugs counselling centre. Hooid ki la don kiba kum kine ha ka jylla Meghalaya hynrei, lehse, kaba donkam ka long ba kine ki dang dei ban don kham bun, bad dei ban pynduna shibun ia ka bai siew, namarba ki don kiba la don lypa ruh hynrei ka bai sumar ha kine ki jaka ka rem tasam bad kiba duk kin ym lah kot bor satia. Ka sorkar ruh ka dei ban kham shim khia bha ia kane ka phang namar kumba ka long mynta, ka sorkar ka dang kheinsting palat halor kane ka bynta. Kaba sngewsih ruh ka long ba, kyllum lang kum ka imlang sahlang, ka dang kheinsting bha kumno ban rat dyngkhong ia kane ka jingsniew. Wat hapdeng ki bor synshar shnong ne bor jong ki balang kim ju kham ialap ne shim khia ia kane ka bynta. Dei na kata ka daw ba sa roi ka jingdih droks bad dih kyiad ruh ha ka jylla.
Kumba la kdew haphrang, la donkam ka jingiatreilang jong baroh ban rat dyngkhong lane ban jop ia kane ka jingsniew, ym tang ki pulit lane katto katne ki seng bhalang, kam pat biang satia. La donkam ban pynsangeh lane pynduh ia u droks namar, haba don u droks ki nongdih ruh ki ioh ban dih hynrei lada ym ioh droks shuh nagno nagno ruh ki nongdih kin duh dih kein. Hab ban ialehthma pyrshah ia ki Nongdie lane ki nongkhaii droks. Ki nongkhaii lane ki nongdie ki kham ma bun shah ban ia ki nongdih bad donkam ban rat dyngkhong ia ki. Nangta dei ban iasnoh kti lang baroh ban kem ia kito kiba supply droks sha ki samla ne sha ki nongdih bad aiti ia ki sha ka ain ban pynshitom ia ki. Kaba donkam tam ruh ka long ba dei ban ai jinghikai kaba janai ia ki samla bad ia ki khynnah ruh ban pynsngewthuh ia ki shaphang u drok bad kumno ban kiar raimaw raidieng ia u. Shuh shuh, ban iarap lem ia kito kiba la ngat ha kane ka jingdih ban lait noh na ka jingdih droks lyngba ki jinghikai kiba sani bha bad ban iarap ia ki ban ioh kam ioh jam lane ban pynbunkam ban klet noh ia u droks.Kane ka thma ka long ban ialeh mynta, ym ban dang buhteng, nama ka por ka la dier palat (it is now or never).