Ka ILP kan nym ktah ia ka kam jngohkai pyrthei, ong u bah Prestone

Shillong: U Symbud Myn tri Rangbah ka jylla u bah Prestone Tynsong mynta ka sngi, u la kam ba ka Inner Line Permit (ILP) kan nym ktah satia ia ka kam jngohkai pyrthei ha ka jylla.

Hynnin ka sngi, u CEO ka NITI Aayog u Amitabh Kant u la ong ba ka jylla Meghalaya kan dei kawei na ki jylla kaba kongsan bha ban kyntiew ia ka kam jngohkai ha kine ki saw ne san snem ban wan.

“Lada ka sorkar India ka pdiang ia ka jingrai ka iing dorbar ka jylla ban pyntreikam ia ka ILP ha jylla, ka sorkar kan sa shna ia ki kyndon ha kaba ki nongjngohkai kin nym shah pyndik eiei ruh em”, la ong u bah Prestone.
U la ong ba ka sorkar jylla kan sa shna ia ki kyndon jong ka ain, kiba suk kiba jem bha ia ki nongwan jngohkai ha kaba ki lah ban rung suk khlem kano kano ka jingeh.
“Ngin shna ia ki kyndon kiba jem bha ban nym ktah ia ka kam jngohkai pyrthei. Ngin ailad ia ki nongwan jngohkai ban wan laitluid ban mad ia ka jingitynnad ka jylla”, la ong u bah Prestone.
Ha kajuh ka por, u la kyntait ia ka jingmut dur ki paidbah ba ka sorkar pdeng kan nym ai ILP ia ka jylla Meghalaya. “Ngim lah ban ong ia kaba shu mutdur, ngim pat ioh iakynduh ia u myntri tnad kam pohiing ka ri u Amit Shah, bad hadien ba la iakynduh ngin sa sngewthuh ia ka sur ka sorkar pdeng”, la ong u bah Prestone.
U la ong ba ka sorkar jylla ka pyrshah tylli ia ka Citizenship Amendment Act (CAA) 2019 ha ka jylla bad dei kane ka daw, ba ka la khot ia ka dorbar kyrpang ban shim rai da ka ILP.
“Ka rai ka iing dorbar ban dawa pyntreikam da ka ILP ha ka jylla, ka pyni ia ka jingkitkhia bad jingkitkhlieh ka sorkar. Ki paidbah bad ka sorkar ki la ieng tylli halor kane”, u la ong.
U la ong ba ka sorkar kam don jingthmu ban ujor sha ka Supreme Court pyrshah ia ka CAA kumba leh ka sorkar Kerala namar ba ka jingshim rai ka iing dorbar ka la biang palat.
“Nga kwah ban tip katno tylli ki jylla ki la shim rai kumba leh ka Meghalaya ban pyrshah ia ka CAA. Nga iohi wat ka Supreme Court kam pat pynmih kano kano ka hukum ban pynsangeh ia ka CAA”, la ong u bah Prestone.
“Ngi dang ap ia ka khubor ban iakynduh ia u Amit Shah. U myntri rangbah ka jylla u Conrad K Sangma u la thoh shithi sha u Amit Shah ban iakynduh bad ngin sa ap ia ka jingmih ka jingialang”, u la ong.