Ka ILP kaba kwah tang ki sengbhalang, ong u Bah Rowel

Shillong, 18 Nailur:
U Symbud Myntri Rangbah ka jylla u Bah Rowell Lyngdoh u la buh jingkylli la ka jingiakhih jong ki sengbhalang ha ka jylla ban dawa pyntreikam ia ka Inner Line Permit (ILP) ban khang lad ia ka jingwan ki briew ba nabar sha kane ka jylla, kan long kaba myntoi ne em.
“Ngam thikna la ki paidbah ka jylla ki kwah ILP. Lehse ka jingdawa ka dei tang jong ki katto katne ki sengbhalang”, la ong u Bah Rowel ha kane ka sngi Balang.
Katkum ka jingong u Bah Rowel, ka rynsan kaba biang ban ioh ia ka jingsngewthuh shai ia ka jingmut jong ki paidbah ka jylla la ki kyrshan ne ki kyntait ia ka ILP ka dei lyngba ka elekshon.
“Lym kumta, ngam iohi ba la ki don kiwei ki lad kiba ki paidbah ki sngewthuh. Ia mynta dei tang ki sengbhalang kiba pyrta ia ka jingdonkam ban wanrah ia ka ILP. Hynrei ia kane, ym lah ban shim ba ka dei ka jingdawa jong ki paidbah jong ka jylla” la ong u Bah Rowel. U la ther ruh ia ki sengbhalang kiba khot pynlong ia ki jingiakhih kum ki pakhang shnong bad pakhang ophis.
“Ka jingkhot pynlong ia ka jingiakhih kum kine kin pyniaid ia ka jylla shadien. Ngi dei ban sngewthuh ba ki paidbah ki shem jingeh namar kine ki jingiakhih” la ong shuh shuh u Bah Rowel.
U la ong ba ka roi ka par ka wan tang lada don ka suk ka sain ha ka jylla.
Kane ka jingkynthoh u Symbud Myntri Rangbah ka la long haba ki sengbhalang ha ka jylla ki la khot pynlong ia ka jingiakhih ha une u bnai naduh ka 2 tarik haduh mynta ban dawa ban pyntreikam ia ka ILP ha kane ka jylla ban khanglad ia ka jingwan rung ki briew sha kane ka jylla kaba long ka jingma ia ki trai jaka trai muluk.